محمد رمضان: لم يتخطاني أحد ولم يكن هناك "نمبر وان" قبلي

تصدر الفنان المصري محمد رمضان حديث منصات التواصل الاجتماعي بعد تصريحاته الاخيرة التي قال فيها "أنا قبل لما أقول نمبر وان كنت متأكد بالدلائل إن محدش تخطاني في اللي أنا وصلت له ومحدش حقق اللي حققتو".

وتابع محمد رمضان خلال حديث مع الفنانة إسعاد يونس ""مش في طموحي إني أكون عالمي حتى الآن لأن الممثل فرد بيمثل فئة أنا ممثل مصري وأنا بمثل جميع الفئات المصرية ولو عشت 100 سنة مش هعمل واحد في المية من الشخصيات اللي ينفع أعملها من بلدي، فعمر ما كان طموحي أمثل بره أو أمثل شخصيات مش عايشة جوه محيطنا العربي والمصري".

وتابع محمد رمضان"الأسرع في الانتشار والوصول للعالم خط المزيكا وهو أسرع من التمثيل، لأني من خلاله سهل أوصل لباقي الكرة الأرضية أسرع من التمثيل". 

وأكمل حديثه عن النجم الراحل عمر الشريف، وكيف أثر في مشواره الفني، واصفاً إيّاه بأنه كان بمثابة طوق نجاة له.

وقال محمد رمضان إنه "تعاون مع عمر الشريف عام 2007 في فيلم "حنان وحنين"، موضحاً: "عمر الشريف كان أبويا الروحي وكان بمثابة طوق نجاة اتحدف لي وأنا بغرق في بحر اليأس، لأني ما كنتش بشتغل وقتها ومفيش دليل يقول إني ممكن أكمل وأنجح، وطلع النجم العالمي الوحيد في مصر يقول ده اللي اختارته يكمل مسيرتي وشايفه هيكون أحسن ممثل في مصر وما فهمتش كلامه وما فدنيش على مستوى الشغل وجالي أدوار ولكن إداني قوة وحسسني أني ماشي صح".

وأضاف: "بدأت أقنع نفسي أن هعتبر أني ما سمعتش كلام عمر الشريف علشان لو صدقته مش هعمل بيه... إيناس بكر مديرة أعمال عمر الشريف مرة قالت لي أنت متأكد من اسم محمد رمضان ومتأكد أنك عاوز تكمل مشوارك الفني بيه، قلت لها والله آه، وردّ عمر الشريف قال لها ده أحلى اسم لأن محمد أكتر اسم موجود في مصر ورمضان أكتر شهر ما تحسيش به غير في مصر ومحمد رمضان يعني مصر".

ولفت محمد رمضان قائلاً: "أنا مش بغني راب ولا تراب ولا مهرجان، لكن النوع اللي أنا بقدمه مخلوق جديد وملهوش مسمى ويمكن بعد 40 أو 50 سنة يبقى نوع جديد ويتسمى مثلاً باسم رمضان، أنا طلعت بنوع الغناء بتاعي بناء على فكر ورؤية وقدمت شيء عجب الجمهور وعلشان أنا شخص ذكي بكرر نفس المشروع في الإعلانات والأغاني المستقلة، ولو أغنية "نمبر وان" مكنتش نجحت كنت خسرت الممثل والمغني، ويبقى خسرت كل حاجة".

واختتم محمد رمضان حديثه مؤكداً: "قبل ما اختار النوع دورت على نوع المزيكا اللي يتناسب مع صوتي فلقيت نوع برازيلي يتناسب مع صوتي وبعدين دورت مع الكلمات اللي تناسب مع الشخصيات اللي مثلتها فاخترت نوع يليق مع الشخصية بتاعتي وصوتي والأدوار اللي اتعرفت عني بعيداً عن الراب والتراب والطرب الشرقي، النهاردة "نمبر وان" بتتحط على حفلات التخرج وفي كل شيء".