المخرج محمد ياسين: وحيد حامد مش مجرد كاتب سيناريو عادي هو فنان بمقاييس فنية

رام الله - دنيا الوطن
حرص المخرج محمد ياسين على الإعراب عن افتقاده الشديد للكاتب وحيد حامد فى ذكرى وفاته ، حيث كانت تجمعهما علاقة صداقة قوية دامت لأكثر من 20 عامًا.

وقال ياسين:"أنا مفتقده بشدة على المستوى الفني والإنساني، أستاذ وحيد كان قيمة كبيرة جدًا وبيمثل لي شراكة إنسانية وفنية كبيرة، ومفتقد وجوده كمرجعية لتحليل كل الأمور."،حسب ما ذكر موقع (القاهرة ٢٤)

وتحدث ياسين معلقًا على شخصية وحيد حامد على الجانب المهني والشخصي: وحيد حامد مش مجرد كاتب سيناريو عادي، هو فنان بمقاييس فنية متميزة، وإضافة كبيرة لأي حد اشتغل معاه، هو دايما في بالنا وطول الوقت كنت بنتظر المشروع واللقاء اللي يجمعني به، كان بينا تواصل دائم وكنت بحب تحليله للأمور بوعيه وخبرته الكبيرة.

وكشف محمد ياسين أقرب الفترات لقلبه التي جمعته بالكاتب وحيد حامد، قائلًا: هو مكنش في حالة صحية كويسة في الفترة الأخيرة وإحنا بنشتغل على الجزء التالت من مسلسل الجماعة، وفي الفترة دي كان في حالة تقارب بينا مختلفة وعلاقة شديدة المتعة، وجلساتنا على المستوى الإنساني اللي كان بيتكلم فيها عن بداياته ولحظاته الأولى اللي جه فيها القاهرة والصعوبات اللي قابلها، كأنه كان بيودع الحياة وعايز يحكي عن كل الأشياء الجميلة اللي حصلتله وعن زمنه الجميل والشخصيات العظيمة اللي قابله. 

تطرق ياسين للحديث عن العلاقة القوية التي تجمعه بالمخرج مروان حامد نجل وحيد حامد: مروان من أقرب الناس ليا في الوسط الفني وبتجمعني به علاقة صداقة قديمة، وبراقب كل خطواته وبينا علاقة إنسانية جميلة جدًا، وبستمتع جدًا بالنقاش الفني اللي بيجمعنا ببعض.