شاهد: زياد برجي يكشف عن تلقيه تهديد بالقتل بسبب إليسا

تابعنا أيضا عبر تليجرام t.me/alwatanvoice

و علق زياد برجي على تسريب الأغنية بصوته، حيث أكد على أنه عمل تيزر لإليسا وهو ما يحدث مع أي ملحن، حيث قال: "بأول 10 أيام وهيدا بيصير بين أي ملحن وفنان، أصلا نحن بننزل أغانينا بنلاقي الناس بيغنوها، فكيف إذا أعلن الملحن إنه بعد 10 أيام حابب ينزل هالأغنية؟ ويصورها وهو أصلا هالأغنية كان بده ينزلها من قبل ومجهزها لتكون بالإصدار، ولما عجبتها لإليسا و أعطاها ياها للأغنية من كل قلبه باتفاق خاص شفهي أمام الله بيني وبينها".

و أضاف" كنت ناوي أنزل هالأغنية بصوتي لأنه هي عارفة هاد الشي وكانت معمولة لزوجتي وعيد زواجنا، وكنت ناوي أنزلها بعد 6 شهور، فبما إنه الشي الي صار بيناتنا وبين الله، ولكن بعد الأزمة الي صارت بيننا قررت غناء الأغنية وطرحها في 11 سبتمبر المقبل".

وتابع" في فنان عنده عقل برأسه عم يشتغل على أغنية وقرر يقدمها وصار عليها كل هيدي البلبلة والحديث وراح اشتغل عليها بشكل محترف، ومش عاطيها لحدا وعم يصورها مع نادين الراسي وتحت اخراجها، ومكلفها إنتاج عالي لأنه بيعتبرها الوردة اللي كان راح يقدمها لزوجته من سنة، غلط وما قدملها ياها، وحب يرجع يقدم لها ياها ضمن كل الشروط اللي بتفرضها الأعراف والقوانين، القوانين مساحتها أسهل من هيك بكتير، الأعراف إنك تنتظر بس حتى الفنان يفرح بأغنيته، وأنا لما أغني كل أغانيي من بعد ما أعطي حدا كلهن بيفرحوا، ليش هيدي الأغنية بالذات مزعوجين منها هالقد إليسا والفانز تبعها"؟.

و تابع" لأنه إجاني إنذار غير مسبوق من إليسا بقول نهار الجمعة، إنه عم تمنعني غني الأغنية أو حتى لحنها، أنا قدمت شكوى ضد تسريب الأغنية، وتلقيت تهديد من مجهول شتم فيه عيلتي وهددنا بالقتل، هيدا مش مزح! وأنا ما بدَّعي أنهم فانز إليسا لهيك تقدمت بشكوى ضد مجهول، بس في حال طلعوا طابور خامس بسيؤوا لسمعة إليسا وبمارس هيدا الشي برأيك مو المفروض يكون في موقف من إليسا تجاههم، و تعملهم بلوك وما تتشرف إنه يكون هيك فانز لها".