شاهد: فنان شهير يعلن إعتزاله للفن لهذا السبب

تابعنا أيضا عبر تليجرام t.me/alwatanvoice

و كتب إدريس: "بسم الله الرحمن الرحيم.. بعد ٣٥ سنة سعي وتعب وشقى في الوسط الفني، قررت الاعتزال والابتعاد تماماً وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد... وده قرار أخدته بعد ما الأمور وصلت في الوسط الفني لمرحلة عبثية وصلت إني بقيت بشوف بعض الزملاء بيشحتوا الشغل علني علشان يشتغلوا لأن الشغل بقى متقسم على ناس معينة".

وأضاف" فلو الأمور وصلت لكده أبعد أحسن... وحتى لما بيجي شغل بيتفرض عليك توافق بأقل الفلوس وتخرج من الشغل مديون... ومواقف مهينة زي أن شركة إنتاج تعرض عليك أجر هو قيمة ربع أجرك والسبب إن الميزانية مصروفة على الديكور... طب خلّو الديكور يمثل".

و تابع" هحكيلكم موقف حصل معايا من أسبوع... اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في المئة للكاستينغ دايريكتور... كان هيجيلي جلطة بعد ما قفلت المكالمة ووافقت علشان أنا محتاج أشتغل ومحتاج فلوس... وماقدرتش أستوعب الفكرة بصراحة إني بعد العمر ده مضطر أدفع علشان أشتغل فاتصلت واعتذرت... وده الحال حالياً إن الأمور بقت في إيد كاستينغ دايريكتور... وده موقف من مواقف كتير مريت بيها لو حكيتها محتاجة كتاب مش بوست عالفيس فطالما الشغل بقى لازم يتدفعله... وطالما الشغل بقى بالشحاته... يبقى بلاش أحسن".

و استكمل حديثه قائلًا: "أنا طول عمري راضي والحمد لله... بس حقيقي أنا وصلت لمرحلة اكتئاب وصّلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحلة نفسية ومادية إني بقيت مش قادر أربيهم ولا أصرف عليهم وأنا عندي تلات أطفال بعبدهم عباده متخيلين حجم المسؤولية... وبقيت مديون لطوب الأرض... حقيقي لو حد عنده فرصة سفر ليا هأكون شاكر ليه جداً وهيكون جميل في رقبتي لحد ما أموت لأن حقيقي أنا مش قادر أعيش في البلد دي تاني أنا حاولت أسعى في أي مجال تاني بس ماقدرتش".

واختتم شريف إدريس حديثه بالقول: "وحقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شيء... همسح أبلكيشن فيسبوك من تليفوني لأني هنزل أبيع تليفوني أصلاً... فأنا هاكون متاح أونلاين لحد بالليل... لو حد عنده فرصة شغل وسفر ليا ومش معاه رقمي يا ريت يجيبه من أي حد... ملحوظة: أنا مش محتاج طبطبة من حد أنا محتاج فرصة سفر وشغل تخلّيني أعيّش أولادي وبس... شكراً ليكم محبّتي للجميع هاين عليا أقوم أرمي نفسي من البلكونة بعد ما وصلت إني أكتب البوست ده".