مخرج مصري يحذّر من خطورة تصريحات شريف منير.. ما السبب؟

مخرج مصري يحذّر من خطورة تصريحات شريف منير.. ما السبب؟
شريف منير
أثار المخرج المصري محمد دياب الكثير من الجدل، وذلك بعد ردة فعله التي أبداها بعد تصريح الفنان شريف منير بوجود "أهداف غير فنية" وراء جوائز لجان تحكيم مهرجان كان السينمائي.

و حذر دياب من خطورة التصريحات شريف عن فيلم "ريش" للمخرج عمر الزهيري، لافتا إلى أن عدد كبير من الفنانين العرب انضموا للجان تحكيم مهرجان كان وغيره من المهرجانات العالمية ويمكنهم الإفادة إذا تعرضوا لأي ضغوط للتصويت لفيلم بعينه.

و نشر  دياب مخرج فيلم "أميرة"، الذي تم عرضه بمهرجان الجونة، بيان عبر حسابه بموقع التواصل الإجتماعي (فيس بوك)، قال فيه: "كلام الأستاذ شريف منير ان الجوايز اللي خدها فيلم ريش هي مؤامره من الغرب علي مصر كلام خطير جداً خاصه انه من فنان كبير".


و أضاف" هتكلم من خبرتي كعضو لجنه تحكيم في مهرجان كان، و عضو في اكاديميه الاوسكار: قولاً واحداً مفيش انسان لا بالتلميح و لا بالتصريح عمره بيحاول يأثر علي اختيارات لجان التحكيم و اللي اعضاءها بيتكونوا من فنانين مميزين من انحاء العالم، اداره اي مهرجان دورها بينتهي بإختيار الافلام المشاركه و نقطه و يسأل في ذلك الفنانين اللي كانوا اعضاء لجان التحكيم في المهرجانات الثلاثه الكبري زي هند صبري و نيللي كريم و محمد حفظي".



و تابع" طب ليه الافلام اللي بتروح مهرجانات بتبقي عن الفقرا او عن المشاكل؟ الافلام المستقله في العالم كله هي الافلام اللي خارج منظومه الانتاج التجاريه، يعني الافلام اللي مش لاقيه انتاج و دي بتبقي دايماً الافلام اللي عن المهمشين او الناس اللي ملهاش صوت، و بما انها افلام مش متوقع منها تجيب فلوس فبيبقي عند صناع العمل الجراءه انهم يعملوا اختيارات فنيه جريئه و ده بيخليها مغريه للمهرجانات اللي بتدور علي سينما جديده و مختلفه".

و استكمل دياب" سنه 2019 الفيلم اللي كسب البالم دور هو (شوب ليفترز ) الياباني ، و سنه 2020 اللي كسب نفس الجايزه هو (باراسيت) الكوري و بعدها اكتسح الاوسكار، و الفيلمين عن العشوائيات في دول عالم اول و بلادهم احتفت بالفيلمين و بصانعيهم بالرغم من ان العشوائيات نسبتها في الدولتين لا تذكر".

و أكد على أن المميز في فيلم ريش مش الفقر علي الاطلاق بل اسلوب مخرجه الجرئ و طريقه سرده المختلفه، و سواء عجبك الفيلم او لأ لازم نشيد بإن الفيلم ده فيلم بصوت و طعم مختلف فنياً مش موجود في السينما المصريه، و الفقر و المشاكل لا يمكن يدخلوك مهرجان كبير لو مفيش جوده صنع او تجربه سينمائيه رائده، و فيلم ريش فيه تجريد للمكان و الزمان، و الفقر فيه خلفيه للقصه لدرجه ان المكان مش شبه مصر و لا أي مكان في العالم.

و أشار إلى أنه لو الفنانين نفسهم هم اللي بقوا بيرددوا الاتهامات اللي من نوعيه تشويه مصر فدي مصيبه، لأن الكلام ده فيه مزايده علي الرقابه و علي منتجي الفيلم و علي المهرجانات اللي بتختار الافلام و هيخلي اي فيلم عن المهمشين متهم بالتزلف و بيصعب انه ينتج او يُجاز.

و اختتم كلامه، حيث قال: "للأسف الكلام ده بيخلي الرأي الشعبي يبقي دايماً حاطط افلام المهرجانات في وضع المتهم: اكيد اختاروا الفيلم عشان سبب غير مستواه الفني، و كلام فيه انسحاق و هزيمه و كأننا معندناش القدره نعمل حاجه كويسه، و بمنطق استاذ شريف كان هينسحب من عرض الفيلم العظيم الكيت كات اللي كان بطله و قدم فيه دور عظيم و كنا اتحرمنا من اعظم فيلم مصري، و عمر الزهيري مخرج مصري واعد و يستحق مننا كلنا التحيه و التشجيع، و فيلم ريش مدحه و ذمه لازم يكون في داخل الاطار الفني فقط.

التعليقات