خطيبة عمرو سمير السابقة تنعاه بكلمات مؤثرة وتكشف استمرار علاقتهما

رام الله - دنيا الوطن
وجهت إسراء طاهر، خطيبة الفنان الشاب الراحل عمرو سمير السابقة، رسالة مؤثرة له بعد وفاته.

وكتبت «إسراء» عبر حسابها الشخصى على موقع التواصل الاجتماعي «فيس بوك» في رسالتها، قائلة: «فيه ناس كتير مكانتش بتستوعب أو بتبلع صداقتي أنا وعمرو لمجرد اقتناعهم إن مينفعش اتنين كانوا مخطوبين يبقوا أصحاب بعد كده، بس أنا بحمد ربنا إننا عرفنا نبقى كده، وبحمد ربنا إننا في الشهرين اللى فاتوا كنا قريبين أكتر من أي فترة في صداقتنا، كانت صداقة ليها شكل خاص جداً إحنا بس اللى فاهمينه».

وأضافت إسراء: «رمضان اللي فات كنت بحكيله إني مش عارفة أقرأ قرآن بشكل كافي بسبب التصوير، قعد تقريباً رمضان كله يشجعني أني أقرأ ويفكرني كل شوية أو يصور لي صورة من الجزء اللي هو فيه ويبعتهالي عشان يغيظني ويحمسني، ليلة ٢٧ كلمني مكالمة طويلة أوي وهزرنا كتير واتفقنا على حاجات نعملها بعد العيد، بعدها بدأنا نتكلم عن ربنا وقعد يتكلم عن قد إيه بيحبه أوي وبيزعل لو زعله ونفسه دايماً يعمل مجهود عشان يقرب منه، قعد يشجعني ويدعمني في حاجات ليها علاقة بكلامنا كان عارف إنها مضايقاني».

وتابعت: «في أخر المكالمة قال لي، أنا عارف إنك زعلانه عشان مش هتعرفي تصلي التهجد وأنتي في التصوير بس أنا هدعيلك وأنا بصليها، وأنتي برضو أقعدي أدعي وسبحي لحد الفجر، وبعد الصلاة كلمني وقال لي دعيتلك كتير أوي».

واستمكلت إسراء: «على قد ما قربنا أكتر مؤخراً واجع قلبي دلوقتي، على قد ما هو بسطني عشان مرتاحة إن محدش فينا شايل ذرة ضيق من التاني في أي حاجة، وعشان بحكم مكالماتنا ورسائلنا الكتير في رمضان عارفه إنه بإذن الله صيامه وقيامه إيماناً واحتساباً، تقريباً مفوتش ولا فرصة عبادة وبإذن الله ربنا هيتقبله وده مخليني مطمنة شوية، كمان عشان اتكلمنا في حاجات كتير أوي وشوفت قد إيه متغير في حاجات كتير لما كنا بنفتكرها دلوقتى كنا بنقعد نضحك عليها، وشوفت قد إيه بقى دايماً حريص إنه مايجيبش سيرة أي مخلوق بطريقة وحشة ولا يحكم عليه».