لماذا يضرب "صديقك" القطة بـ"الشلّوط" ؟

تابعنا أيضا عبر انستجرام instagram/alwatanvoice

عن السادية يكتب كارلوس بهجت :

لما كنا في المدرسة زمان , كان دايما بيبقي عندنا الصديق اللي لما يشوف اي قطة في الشارع , كان بيجري وراها و يضربها بالشلوط , و اول ما القطة تترمي بعيد كان يبص لنا و يفضل يضحك ؟! يؤسفني اقولكوا ان التصرف اللي عمله الشخص ده تصرف " سادي " !

السادية الـ sadism , و هي أن الأنسان بيلاقي متعته و سعادته في أذية و ذل الأخر .. يعني في مثل صاحبنا و القطة اللي بتضرب , بالرغم من ان القطة مجتش ناحيته و ماشية في حالها , إلا أن صاحبنا قرر يأذي القطة عشان يتبسط و يضحك .. أه ممكن يكون بيعمل كدة عشان ياخد شويه أهتمام من اللي واقفين معاه , بس ممكن يكون بيعمل كدة عشان هو فعلا سعيد بألم القطة !! ... بس ايه اللي ممكن يخلي شخص يبقي سعيد بألم اللي حواليه ؟!

سنة 2013 و تحديدا في University of British Columbia , قام مجموعة من العلماء بعمل تجربة غريبة عشان يشوفوا علاقة السعادة بالسادية , و جابوا مجموعة من الأشخاص و خياروهم يعملوا كذا مهمة , من المهمات كانت أنهم "يسحقوا حشرات " ! , يعني يدخلوا حشرات في خلاط و يقتلوها (بالمناسبة ديه كانت خدعة يعني كان المشترك يتخيل انه بيقتل الحشرات , بس الحقيقة مكنش في حاجة بتحصل ) ,, و مهمات تانية ملهاش علاقة اوي بالسادية .... النتيجة أنهم اكتشفوا ان الأشخاص اللي اشتركت في سحق الحشرات كانوا في قمة السعادة و المتعة !! .. ففكرة القتل او تدمير كائن تاني و لو حشرة سببت لهم قدر مش قليل من الأرتياح النفسي !! .. بس برضة ليه ؟!!

الموضوع بيبتدي .. لما الطفل بيكون صغير و شايف اللي حواليه بيتحكموا فيه و بيمارسوه سلطتهم عليه .. فبيحس انه مفتقد لجزء مهم من حريته و أرداته .. بيكون زي مشتاق أنه يسترد الجزء المفقود ده , و اللي بيتمثل عنده في فكرة السيطرة علي الأخر .. هو عاوز يبقي قوي و قادر زي الناس الكبيرة ! , المشكلة لو الناس الكبيرة ديه كانت مؤذية اوي تجاهه و كانت بتسبب له ألم نفسي في كل مرة يتعامل معاها .. هنا بيبقي مش عاوز يسيطر في اللي حواليه بس , لا ده عاوز يسيبب لهم ألم زي ما أتسبب له ! هنا هو سادي !! .. علماء كتير بيرجعوا سبب الشخصية السادية للتربية و النشأه بالرغم ان في عوامل زي الجينات برضة ممكن يكون ليها دور .. بس الملحوظ أجتماعيا , ان كل ما كان المجتمع قاهر للاشخاص , كل ما ظهرت علامات السادية بين افراده ..

سادية مش مجرد طفل بيضرب قطة , او اشخاص يسحقوا حشرات .. أنما السادية أنك تقرر تأذي شخص ملوش دعوة بيك لمجرد أنك اعلي منه في الشغل او هو محتاج منك خدمة .. أنك تسعي لتدمير علاقات شخصية مستقرة بين ناس لمجرد أنك تشوفهم محطمين او مجروحين .. أو أنك تعذب حد بيحبك او بيثق فيك ,سواء عذاب جسدي .. زي السادية الجنسية و هو أن الشخص يكون قمة نشوته الجنسية في ألم او ضرب الشريك ..أو عذاب معنوي و هو أن الشخص يكون قمة فرحته لما يشوف شريكة مكسور او متعذب بيه !

في النهاية كارل يانج كان بيقول : The healthy man does not torture others " generally it is the tortured who turn into torturers " بمعني أن الأنسان الطبيعي مش بيعذب الأخرين , أنما الشخص اللي تم تعذيبه هو اللي بيتولي التعذيب ! .. فالسادي بالرغم من أدعاءه السيطرة او القوة , هو شخص محطم مقهور في ذاته بيعوض نقصه و عاره بوجع و ألم اللي حواليه .. و لو كان اللي حواليه .. قطة , حشرة .. او حتي أكتر الأشخاص اللي بيحبوه ..