للقصيرات.. كيف تختارين الملابس المناسبة لتظهري أطول

رام الله - دنيا الوطن - وكالات 
كتير مننا شايفين إنهم قصيرين وعايزين يظهروا أطول، النهارده في فيديو جديد من برنامج "فاشون" ياسمين هتقول لك على نصايح هتساعدكم تظهروا أطول شوية من غير تعب الكعب. ­ 

١- في البداية خلينا نتجنب أي حاجة بتظهرنا أقصر زي البنطلونات والفساتين والجيبات اللي بتنتهي عند منتصف الساق زي البيرمودا مثلا.

٢- تجنبي كمان أي حاجة مقلمة بالعرض علشان هتظهرك أتخن وأقصر واستبدليها بالمقلم بالطول.

٣- كمان بلاش الإكسسوارات الكبيرة زي الشنط الضخمة والأحزمة العريضة والسلاسل الكبيرة.

٤- لو مش محجبة يبقى خلي بالك إن الشعر الطويل كمان بيـظهرك للأسف أقصر، فلو حابة تسيبي شعرك يبقى الأفضل يكون قصير.

٥- كمان ياريت نختار لبسنا بحيث يكون مقاسه مظبوط علينا، لا أكبر ولا أصغر لأن في الحالتين هتظهري أقصر.

دلوقتي هنتكلم عن الطرق اللي تظهري بيها أطول:١- البسي جيبات وفساتين ماكسي بسيطة ومافيهاش قصات، ده هيخلي شكلك أطول للعين اللي بتشوفك.

٢- البسي بنطلونات رجلها واسعة من تحت زي الشارلستون ومعاها البسي جزمة كعبها عريض ومعقول٬ وسيبي رجل البنطلون يغطي الكعب ، كده هتبقي لبستي كعب مريح وفي نفس الوقت ظهرتي أطول.

٣- البسي طقم كامل بلون واحد، ده بيخلي العين تشوفك أطول لأن مفيش ألوان كتير تقسم الجسم وتظهره أقصر.

٤- ­اعملي شعرك ديل حصان أو كحكة عالية، ده هيزيد من طولك كمان.