سلوكيات

بالفيديو .. نصائح للتعامل مع الأطفال المتعبين في الأكل بعمر السنتين

2016-02-23

رام الله - دنيا الوطن
فيه أطفال كتير بيرفضوا الأكل وبياكلوا كميات قليلة جدا، ومنهم اللي مبيحبش ياكل الأصناف المفيدة من الأكل. أول نصيحة ليكي إنك ما تقلقيش لأن الاطفال ممكن يقعدوا من غير أكل أكتر من يوم من غير ما يحصل لهم أي حاجة٬ وخدي بالك إن معدة الأطفال صغيرة فمش معنى إنه مش بياكل كمية كبيرة إنك تقلقي.

ثاني حاجة متغصبيش الطفل على الأكل أبدا سيبي الأكل قدامه وامشي من غير إصرار منك على إنه ياكله.. مش معنى أن طفلك يرفض أكلة معينة أنه رافضها خالص ممكن يكون بيحاول يلفت نظرك مش أكتر نوعي الأصناف اللي بتقدميها له بس خدي بالك يكون أكل صحي.

هاتي طبق وحطي الأكل فيه ممكن جزر وشوية فاكهة لأن الفاكهة بتفتح النفس٬ وكليهم قصاده وإنتي مبسوطة٬ علشان هو هيحب يقلدك بس مش هيحب الأوامر٬ امنعي تماما الحاجات الحلوة اللي بتشتريها من بره، يعني البطاطس الجاهزة والعصاير والبسكويتات دي حاجات بتسد نفس الأطفال، وكمان سهل إنه يقرر ماياكلش وهو عارف إن فيه بطاطس أو إن فيه بسكويت.

ممكن إنتي تعملي الحاجات دي في البيت وتخليها مفيدة زي إنك تعملي له الكيكة في البيت وتحطي فيها مكسرات وزبيب مفيدين، أو تعملي الشيبسي في البيت، والكوكيز كمان. اعملي قصة بسيطة عن الخضار وعن الفاكهه وأهمية كل نوع منهم. سيبي طفلك ياكل بنفسه اديله المعلقةه وافرشي تحته وسيبيه يوقع وياكل ويجرب.

الدراسات بتقول إن الأطفال اللي بياكلوا بنفسهم بيشبعوا أكتر من الأطفال اللي أهلهم بيأكلوهم حتى لو الكمية أقل بكتير.. لما تحبي تدخلي لطفلك أكلة جديدة اختاري الوقت اللي الطفل بيكون جعان فيه عشان تزيد فرصة إنه يتقبله وما تنسيش تعلمي طفلك إنه ياكل وهو قاعد وما تجريش وراه ولا تأكليه وهو بيلعب. شاركي طفلك في شراء الطعام وخليه يساعدك في إعداده عشان يبقى متحمس ياكله.