بالفيديو .. كل ما يتعلق بإختيار حمالة الصدر الرياضية

تابعنا أيضا عبر تويتر @alwatanvoice

إنارة : لما تَستغربون شيء وَ تستسخفون إللي قَدامكم سوا بَحث قبل لا تستهبلون ، حَتى لا ينقلب السحر على الساحر

المَصداقية مَطلوبة للإجابة عالأسئلة ،’
– كم وحدة فيكم تلبس برا رياضي أو لبس مخصص للرياضة ؟
– كم وحدة فيكم أصلاً ما تَسوي رياضة وَ تقول الحمدلله أنا رشيقة ما أحتاج ؟
– كم وحدة ما تكترث بالرياضة وَ تحسها غير مُفيدة ؟
– كم وحدة جربت تسوي رياضة وَ مالقت فائدة ؟

عندما أتحول لنشبه ~
تصدقون !! كنت أتبع وحدة بالأنستا وَ أعتقد نزلت بوست ناسية بالضبط وَش تقول فيه بس فيما معناه أحلى شي إنك تسوي رياضة بالبيجاما
عاد تعليقات البنات عالبَوست : ايه .. إيه .. وَ الله صادقه ، أحلى شيء ، أحب العفويين مو مثل المتفسلفين ، وَ كل وحدة فردت إستخدامات البيجاما
صراحة أصابني الذهول بس لو بنشوفها من الجانب الإيجابي – كثر الله خيرهم – إنهم يمارسون رياضة

المشكله نفس هالبنت سبق وَ إنتقدتها لأنها تروح الجامعة بالبيجاما ( الله يعين البيجاما وَش تستحمل وَ لا تستحمل ) ، بعد فترة جاني الفالج من الأخطاء الصحية وَ التجميلية إللي ترتكبها وَ صلحتلها آنفولوا لأن حسيت إني بديت أنتقدها كثير وَ صايرتلها مثل العجوز النشبة ، فليش أجلس أصحح مَفاهيم لأحد أفضل شيء أطرح مَوضوع يصحح المَفاهيم لكثير وَ إللي بيستفيد يستفيد ، بَدون ما يَحس إني مَستقصدته لأن بهالزَمن الواحد ما يَتحمل ضغوطات نفسية خارجية.

[ حتى أذكر وَقتها بلوقر شافت رَدي وَ إستهجنت المَوقف مثلي .. فقلت الحَمدلله نظرتي طبيعية مو مُبالغة ] ..

وَ للأسف كثير حسابات في الأنستقرام قاموا يتفلسفون في الرياضة وَ يعطون نصايح غلط مستنسخينها من حسابات كمال أجسام أو رياضين شباب وَ ينقلونها لبنات يبون ينحفون ، لذلك لا تثقون بأي أحد يتفلسف إلا إذا كان مدرب رياضي أو على الأقل شخص شايفين جسمه ..

مو أشخاص مايعرفون من الرياضة إلا يحطون صورة ثقل وَ سنيكيرز رياضي وَ تحط تحته فتنيس تايم وَ هي ماتعرف من الرياضة إلا تحرك أصبعها بالانستقرام يعني إني أنا الكشخة إللي أسوي رياضة أهم شي لما تشتري لبس رياضة تلبسه وَ تقوم وَ تصلح رياضة فيه مو تصوره وَ ترجعه الكبت [ إنفعلت الأخت ]
شَغلتين جايتهم بالدَور بالرَد مُستقبلاً .

– مرة صورت ثقل أبو كيلو لونه أخضر فاقع ، طَلعوا لي يتفلسفون كيلو واحد مايَسوي شيء ، لأن فيه مُدرب رياضي يستنسخون مَنه قال الكيلو مايَسوي شيء ، وَ فعلاً كلامه صحيح الكيلو الواحد كثقل ما يَسوي شيء ، بس أنا ما أستخدمه لبناء عضلة وَ لا كثقل ، يوماً ما بكتب بَوش أستخدمه ، بالإضافة كان اللون الأخضر يليق مع الصورة

– مرة كتبت إن تمارين الكارديو تعجل بالشيخوخة ، طبعاً فيه إللي ستنكروا وَ فيه إللي مَنشنت مُدرب رياضي وَ جاء يتفلسف بحسابي وَ قال إن كلامي غلط ، نفس الشيء بصور كلامه وَ بحطه بَموضوع ثاني وَ هالمرة عشان يَنعدل وَ يصحح مَعلوماته بظهر إسمه وَ إللي يحبه يوصله الكلام ، ليته قبل لا يناقض كلامي يقرأ شَوي .. عشان يتحلى بالأمانة وَ المَصداقية لأن البحوث العلمية وَ الدراسات تتجدد ، مافيها شيء لو جدد مَعلوماته شَوي ، وَ لا بها عَيب لما أحد يضيف لك شيء لعلمك جَديد .. وَ هذا لو دل بيدل على إنه مُدرب غير مُعتمد

[ وَ عفكرة أنا ما أنتبهت إنه مُدرب رياضي وَ لا عرفت عنه ، بس وحدة من مُتابعاتي وَ تحية لها من هنا أرسلت لي عالدايركت كلامه ]

المهم فيه كثير حسابات باليوتيوب لمدربين رياضين يحطون جداول رياضية وَ نصايح ، غير إن كثير مدربيين وَ رياضيين عندهم برامج تقدرون تشترونها وَ تطبقونها ، أتوقع إللي مايعرف من وين يبدأ بيفيده كثير ، يعني حتى كلامي لاتمشون عليه أنا بفيدكم بالقواعد الأساسية إللي أعرفها لأني ماعرف إلا لجسمي ، المُدرب الرياضي شخص أكاديمي دارس ٣ إلى ٤ سنوات بهالتَخصص ، المعلومات الرياضية تَختلف عن المُدرب الرياضي الأكاديمي المُعتمد.

[ إني أكتب روتيني الرياضي وَ الغذائي وَ الصحي ، يَختلف عن إني أكتب روتين عام لعَموم الناس وَ أدري كلامي بيمتعض منه مَليون شَخص ، لأن غالبية الناس ما يَحبون التَخصص يحبون العشوائية .. مُستحيل الخبرة تَلغي مَجهود الدراسة وَ العلم ، الخبرة تفي بالغرض لما تلاحظ على جَسمك ، مو لما تَعطي شخص تمرين وَ هو مُصاب بإحتكاك بالمفاصل أو السكر .. إلخ وَ تورطه مَعك  ]

إتبعوا الحسابات إللي تنزل لكم دراسات مُعتمده مَشهورة وَ حديثة ، تكنيكات رياضية جديدة ، تَلمح لكم لتقنيةجديدة ، رياضات دارجة ،توجه جديد بالرياضة ، مو أنظمة رياضية لأن لكل جَسم بصمه ما يَشبه أي جسم أخر ، وَ خليك ناقدة جيدة لذاتك وَ صادقة إذا إللي تعانين منه كرش أو مؤخرة غير مُتناسقة أو مُسطحة ، صارحي نفسك عَشان تساعدين نفسك وَ تغيرينها ، الكذب على الذات ما راح يفيدك وَ مشكلتك أصلاً بينك وَ بين نفسك فما فيها أي مُشكلة لو صارحتي نفسك وَ درستي عيوبك ( مَين راح يَدري ؟! .. أول حل للتغيير هو وقفة جادة مَع النفس وَ صادقة ) .

سألتوني ،’
من الأسئلة الكثير إللي تجيني ، أي مدرب رياضي تتبعين ؟ وَش تنصيحنا فيه ؟ وَ وين تعلمتي تسوين رياضة ؟
إللي يتابعني من زمان يعرف إني أمارسها من المراهقة ، ما أذكر الفترة العمرية إللي بديت فيها الرياضة بالضبط ، أذكر إني بعد مرحلة اللعب وَ الطفولة بديت أسوي رياضة وَ أغلبها كان آيروبيك وَ ركض وَ بالبداية كانت لعب ، وَقتها أخوي الأصغر مني دخل تايكوندو وَ بديت أتدرب معه بس ماشاء الله هو كمل التايكوندو وَ فاز ببطولة للناشئين.

طبعاً بدايتة يمكن كان بعمر ٨ سنوات ، وَ إستمر فيها لين جته إصابة إضطر يصلح عملية جرائها ، بعدها أمي الله يرحمها ضغطت عليه يتركها لأنها تشوف إنها رياضة حيوانية (على فكرة إلى الآن فيه حسرة انه ماكمل ، للأسف عيلتنا ماكانت داعمه له حتى أنا ما كنت خير داعم له لأني خايفة عليه ).

بعدها بفترة إتجه للبدي بيلدينق ، وَ هنا صار المدرب الخاص فيني ، آخذ أكثر النصايح منه يعني تقدرون تقولون مدربي الخاص ، ما أتبع أحد حالياً لا باليوتيوب وَ لا غيره بس أحب أشوف تمارين جديدة بحكم إن الواحد يمل من تكرار التمارين

لَو كان عَندنا نَوع من التأهيل وَ الإهتمام بالرياضة كُنت أتمنى لو كنت لاعبة جمباز ، لكن تجري الرياح بما لا تشتهي السفن
[ أصلاً ما راح أسلم من سُخرية المُجتمع ، آآآوخس يا جمباز وَش نهايتك يا تُرى خاصة الجمباز يبيله من الطفولة وَ العظم طري ]
لكن ما أنكر كل ما أشوف قريبتي سباحه أولومبيه ( أمها نمساويه ) أقول مالت عَلى وَجهي .. ما أختلف عَني وَ عنها إلا المكان وَ البيئة

إحصائيات وَ تاريخ ~
ملابس الرياضة ماكانت بهالتطور كانت مجرد لبس رياضة بس يضغط الصدر بس ماكان يشكل ذيك الدعامة
الملابس الداخلية للرياضة تطورت يمكن في الـ 30 سنة الأخيرة ، خاصة بعام 2007 م أجرت جامعة بورتسموث دراسة مفادها أن واحد من إثنين من النساء يعانون من ألم الثدي أثناء ممارسة الرياضة.
من المشاكل الكثيرة إللي تعيق العداءات هي ألم الصدر ، أثبتت الإحصائيات أن 32% من العداءات يعانون من ألام في الثدي أثناء الركض وَ السبب الأكبر بهالشي هو لبس حمالات صدر بمقاس غير مناسب وَ الإحصائيات أثبتت أيضاً أن 8 من 10 نساء فقط يلبسون البرا المناسب لهم أثناء مُمارسة الرياضة .

أول برا مُخصص للرياضة Jockbra قبل أن تُعرف بإسم Jogbra

وَ هذه أول بوستر إعلاني ، لو تلاحظون كان البرا نفس الستايلات إللي تلبسها جين فوندا 

ليش لازم نلبس حمالة صدر ( Bra) مخصصة للرياضة ؟
أهمية البرا الرياضي نفس أهمية لبس حذاء رياضي مخصص لكرة القدم أثناء لعب االكرة ، يعني ماينفع نلعب كرة بجزمة عادية لأنها راح تعورك وَ ممكن تنزلق بسببها
ألحين لما نسوي رياضة كل جزء بجسمنا ما يحتاج دعم لأنه ببساطة مدعوم بعضلات وَ عظام ، يعني الذراع فيه عضلات وَ عظام ، الأفخاذ ، أيضاً المؤخرة عبارة عن عضل ، لكن الصدر يختلف تماماً لأن مافيه عضلات ، العضلات تجي خلف الصدر وَ حوله يعني عند الذراع ..

تركيبة الصدر ~
الصدر كتركيبة عبارة عن غدد دهنية وَ ثديية الدعامة الوحيدة للصدر هو الجلد ، يعني الصدر مغلف بطبقة من الجلد يبطن هالغلاف الجلدي نسيج دهني وَ يتخلل هالنسيج شبكة من الألياف تسمى أربطة كوبر Cooper’s Ligament تربطه بالجلد ، هذي الشبكة هي اللي تدعم الصدر

وَ هذا رسم توضيحي لشكل الصدر ركزوا على Cooper’s Ligament أو Suspensory ligament ، عشان تفهمون

روابط كوبر تقدرون تشبهونها بالمطاط كيف المطاط ممكن يتلف مع كثر الشد بالضبط الصدر مثله لو أخذتي مطاط وَ قستيه وَ لعبتي فيه ثم رجعتي قستيه بتلاحظين إنه تهتك وَ صار أطول ، طبعاً وَ إذا تهتك المطاط يفسد وَ ماعاد يرجع ، نفس الشيء مع أربطة كوبر

مَقطع دعائي يوضح الفكرة  لـ شركة NIKE


آهمية حمالة الصدر الرياضة ( البرا – السُتيان الرياضي ) ،’
• مثل ما ذكرت عدم إرتداء برا ممكن يرهل الصدر وَ الجلد لأن حركة الصدر أثناء التمرين ( خاصة الرياضة إللي تتطلب حركة قوية وَ متكررة )راح تمدد روابط كوبر وَ تتلفها مهما كان الصدر صغير راح تتلف هالروابط وَ ماراح ترجع لسابق عهدها ، يعني الأمر ليس ثانوي إنما وجودها أساسي
في دراسة أثبتوا أن الصدر يتحرك بثلاث إتجاهات
ـ للأعلى وَ الأسفل
ـ على الجانبين
– للداخل وَ الخارج
لابد البرا الرياضي يمنع حركة الصدر بكل الإتجاهات
• عدم إرتداء حمالة صدر الرياضة يمكن أن يؤدي إلى التوتر وَ الضغط في الجزء الأعلى من الظهر وَ الرقبة خاصة للصدور الكبيرة ، لأن الظهر يبذل مجهود أكبر في محاولة للحفاظ على توزازن الكتف بسبب ضغط الصدر عليه
• أيضاً في دراسة أثبتت إرتباط الإصابات الرياضية بعدم إرتداء البرا المناسب ، لأن كفاءة التمرين تقل بسبب أن الحركة تنحرف عن مسارها الصحيح لعدم الراحة أثناء التمرين ، وَ هالشيء يخليك تسوي التمرين خطأ
• أيضاً في حال ما لبسنا ممكن نحس بألم في الثدي ممكن يعيقنا عن أداء التمرين
• حمالة الصدر تحمي من شغله يسمونها الـ joggers’ nipple أو إلتهاب حلمة الصدر اثناء الركض وَ يعاني منها الرجال وَ النساء وَ هو إحتكاك حملة الصدر بالملابس وَ كثر الإحتكاك يخليها تلتهب
• أيضاً شكل الصدر لما يطلع وَ ينزل أثناء الرياضة ممكن يكون محرج للبعض وَ إحراجهم يمنعهم من ممارسة الرياضة عند جماعة

إختيار الستيان الرياضي يعتمد على شغلتين ،’


نوع التمرين + حجم الصدر
نوع التمرين إللي حابه تمارسينه ~
Low impact = مثل المشي ، ركوب الدراجة ، اليوغا ، رقص
Medium impact = المشي المعتدل ،التزلج
High impact = الركض ، الآيروبيك ، نط الحبل ، الترمبولين

إهتموا لأن بعدين بقولكم لو أمباكت وَ ميديم إمباكت وَ هاي إمباكت وَ هذي صورة مُبسطة توضح إختلاف نوع البرا حسب إختلاف قوة التَمرين وَ البرا المُلائم له ، من اليسار لو إمباكت ركزوا بالشريط السُفلي ، لين ينتقل إلى اليمين هاي إمباكت 

أنواع حمالات الصدر الرياضية ( البرا – الستيان الرياضي )،’
لو عرفتوا الأنواع زَين ماراح تتوهون بالمَحل وَ لا راح تكونون مرهونين لماركة مُعينة ، أي محَل تدخلينه وَش ماكانت الماركة راح تَعرفين النَوع وَ بتمشين عليه ، وَ هذا وَصف عالمي وَ موجود بكل شركة ، حتى لو ما كتبوا الأسم بتاق اللبس ، من الشكل راح تعرفين مَع شرحي الأن
حمالة الصدر الضاغطه | Compression bras
مناسبه لمقاس الكوب A + B
وَ تاتي على نوعين
Scoop-back تتناسب مع اللو وَ الميديم إمباكت

ركزوا على التفصيلة مُختلفة قليلاً من الخلف وَ خامة القماش برضو خفيفة

Racer-back تتناسب مع الهاي إيمباكت على الأغلب

هذي صَح ريسر باك بس تناسب مع اللو إمباكت يعني التمارين الخفيفة واضح من خامتها وَ شكلها وَ السترابز ( السير ) نحيف وَ القماش مش مبطن أو دبل أو سميك

حمالة الصدر المغلفة | Encapsulation bras
للمقاس D , DD لأنها تحتوي على تفصيل كوب منفصل يعطي دعم مستقل لكل صدر وَ هو الأقرب شبه بحمالات الصدر العادية

حمالة الصدر المختلطه

 ( الضاغطه + المغلفه ) | Compression/encapsulation bras
مناسبة لمقاس الكوب C , D لأنها تعطي دعم أكبر بالإضافة للراحة
وَ تجي مكس بين النوعين الضاغطه وَ المُغلفه وَ صرتوا تعرفون شكلهم ..

بكلا الأحوال البرا بَحر لكن هالتفصيلات هي التفصيلات الأساسية وَ العامة ، بعض الشركات تدمج كل شيء بواحد وَ بعض الشركات تحسين إنك بتنطين من طيارة من قوة الدعامات إللي فيها ، وَ بعضها تتفنن بنوع واحد من البرا ، أنا أحط لكم الأشكال المَتوفرة بالشرق الأوسط أو بالسعودية على وَجه التَحديد ، وَ هذا بيان يوضح لكم أكثر أهمية الخوض بتفاصيل البرا وَ دعامته أكثر كل ما كبر حجم الصدر ، طبعاً مُمكن تلاقون جميع المقاسات بكل الأنواع ، لكن لما فصلت فصلت بناء عالأفضلية 

وَ هنا بعض البرا بأشكال مُتنوعة ركزوا بالتفصيلات تناسب كل جَسم وَ إحتياجه ، مافي شيء إسمه صدري كبير مقدر أسوي رياضة ، لكل وَحدة مكان وَ نصيب وَ شوفوا شلون لما لبسوا مقاس صَح مسك صدرهم صح ، وَ ركزوا عالبرا بالسحابه أول وَحدة عاليسار يناسب الصدر الكبير مره ، وَ كل هالديزاينات للصدور الكبيرة وَ الرياضة القوية 

شوية تفاصيل ،’
[ هالتفاصيل راح أوضحها بالأسهم بريفيو لتجربتي مع البرا الرياضي مع ٣ ماركات مُتنوعه ]
– أكبر داعم للصدر هو الجزء السفلي بالبرا يحمي الصدر من النزول للأعلى لكن بنفس الوقت دعمه مو كافي لأن الصدر يتحرك على الجانبين
– السترابز ( أو شريط الستيان ) كل ما كبر كل ماكان داعم للصدر أكثر خاصة إللي صدورهم كبيره يناسبهم أكثر شي وَ يفضل إختيارها بحيث تقدرون تتحكمون بتقصيرها وَ تطويلها
– الكب لازم يكون ضاغط للصدر وَ أيضا فيه شغله تشكل دعامة تجي إما بلاستيك أو معدن أسفل الكوب إسمها Underwire ببرا الرياضة تكون مرنة عشان ما تأذي الصدر هذا غير إنها تعطي دعم للصدر

نصائح عند تجربة البرا الرياضي ~
ـ لازم تكون شادة على الصدر أكثر من الستيان العادي لكن مع مساحه تكفي لأصبعين أثناء المد ، لازم ماتكون ضيقة كثير بحيث تقدرين تاخذين نفس
ـ السترابز (السير ) لازم مايكون ضيق كثير بحيث يترك علامات على الجلد وَ لا واسع بحيث يطيح ، وظيفة السير إعطاء راحة بشكل أفضلمُش كدعامة ، البعض مفكر إنه كل ماكان سميك كل ماكان داعم أكثر ، هو كل ماكان أريح ماله علاقة بالدعم 
ـ الكب لازم يكون ضام لكل الصدر مايكون واسع وَ بنفس الوقت مايكون فيه أجزاء من الصدر طافحه برا الكوب
ـ حاولي تقفزين أو تركضين أو تنحنين لقدام عشان تختبرين مدى فعالية البرا في تماسك الصدر وَ منع حركته

مُلاحظات ،’
– البرا الرياضي مفترض تكتفي فيه لحاله يعني ماتدبلين ستيانتين ، لكن هالشيء ما يَمنعك من التدبيل
بستيان رياضي خفيف وَ فوقه ستيان رياضي أكثر قوة ، لكن المُفترض ما تَحتاجين 

– مهم يكون نسيج الرياضه مرشح للعرق وَ فيه ميزة التبريد وَ التنشيف السريع للعرق لأن أحياناً العرق ممكن يسبب إنزعاج خاصة في الرياضة الجماعية ، بعض البرا يكون فيه مثل الجيب عشان تحطين جهاز لحساب معدل ضربات القلب

– يجب إستبدال البرا بعد 30 إلى 40 غسلة لأن الغسل راح يخليها تهتري وَ راح تقل كفاءتها بالدعم ، أو تستبدل كل 6 إلى 10 أشهر طبعاً لو أستخدمتيه مو خليتيه مَنظر بدرجك ، وَ راح تعرفون هالشيء إما من التاق اللي باللبس راح تروح الكتابة اللي فيه أيضاً إذا حسيتي البرا من ورى صار يطلع لفوق ، غير اذا تحركتي وَ تحرك الصدر يعني حان وقت التغيير

– من المفترض التأكد من المقاس كل 6 أشهر لأن الوزن يتغير خاصة إللي يمارسون الرياضة بغرض التخسيس
بالإضافة التغيرات الهرمونية إللي ممكن تطرأ أيام الحمل وَ الدورة ( وَ لو تستخدمين برا فيه خيار للمقاسات أفضل ) يعيش فترة أطول من غيره

Bras ( Nike + Oysho + women secret ) My Review
تجربتي لحمالات الصدر الرياضية من ( نايكي + أويشو + ومن سيكرت )

أول شيء أحب أقول إن السوق للأسف لا يَخدم سوى صاحبات المقاسات الصغيرة ، بينما الأكثر حاجة هُم صاحبات المقاسات الكبيرة
وَ يمكن قبل 4 سنوات ما كنت ألقى بمحلات الرياضة إلا الفلبينيات ، وَ ماشاء الله دايم يستغلون مواسم التخفيضات
بجد محلات الرياضة عندنا طوال العام مَوسم تخفيض فأتمنى مَنكم تستغلون هالفرصة لأن فرق السعر شاسع ، وَ خاصة إن البرا الرياضي سعره شَوي غالي
إبتداءً من 200 ريال سعودي إلى 400 ريال سَعودي
[ يعني لو طلع لك بالتخفيض بـ 100 ريال نَعمة ] ..
وَ أكيد يختلف سعره حَسب الدعامة ، كل ما كان للتمارين القوية كل ماكان سعره أعلى

برا أويشو له عندي سنه وَ شهرين
برا ومن سيكرت له عندي سنتين وَ نص وَ أكثر بكم شهر
برا نايكي له عندي سنه
[ جميع البرا المعروض قديم ، لأن حبيت أطرح شيء مُجرب وَ إذا شفت المَوضوع يستدعي طرح أنواع أخرى راح أصور لكم الجديد ]
طرحت القديم للمَصداقية ، نايكي أكثر واحد لبسته وَ أكثر واحد غسلته وَ أكثر واحد شكله جديد فيهم وَ غير مُهتري وَ تجاوز إستخدامي له 20غسله
وَ البقية أستخدمتهم بالرياضات الخفيفة جداً ، ما تَجاوز أستخدامي لهم 10 غسلات ( طبعاً أرقام تقريبية )

خَلونا نَشوف ..

برا نايكي الرياضي| NIKE Bra

السهم الأول : إمكانية التحكم بالسير
السهم الثاني من اليمين : مكتوب دراي فيت خاصية الترشيح
السهم الثالث من اليسار : الأندر واير إللي كلمتكم عنه وَ يدعم الصدر
السهم الرابع وَ الخامس من الأسفل : إمكانية التحكم بالمقاس هذا أشوفه مُمتاز عشان ما تضطرين كل ماتغير وزنك أو تخلخل البرا تشترين واحد جديد ، وَ شوفوا كيف مَتين وَ قوي وَ فيه تعدد بالمقاسات

الستيان مَثالي جداً جداً جداً ، وَ ما تحسين بالحر وَ يرشح العرق وَ بارد عالجسم ..
أنصح الجميع به ، نوعه : ريسر باك هاي إمباكت

برا أويشو الرياضي | Oysho

مو رخيص وَ قربوع وَ إنتِ لابسته تحسين بالحر نسبياً بالرغم به خاصية الترشيح وَ مايسمك الصدر زين
ماراح أرجع أشتريه ، كأنه ستيان عادي وَ المُشكلة تفصيله هاي إمباكت ( للتمارين القوية )
[ يعني أويشو لا تاخذون مَنهم ملابس رياضية إلا لو تي شيرت ، لأن حتى بناطيلهم ما ترشح العرق وَ تتمطط كأن أحد نتفك ]

مُقارنة بين أويشو وَ نايكي ،’

شوفوا أماكن الأسهم ، خربوطي أويشو مفترض يضاهي نايكي بالقوة وَ المتانة وَ شكله مَهتري وَ ما أستخدم كثير ، حتى الاندر واير غير ملحوظ بأويشو لكن راح أصنف أويشو ميديم إمباكت بالرغم يادوب عليه لو إمباكت 

برا ومن سيكرت الرياضي |Women Secret bra

من الداخل
حليل لليوقا وَ الرقص وَ برضو كمان مايمسك الصدر ممكن يطلع الصدر عن البرا
وَ شكله ستيان عادي بَس مُريح وَ برضو مُش رخيص وَ من مجموعة جمبنق ، وَ الله لو أنط فيه صدري بيطلع برا
ما يَنفع ، بس لبسته أكثر من برا آويشو ، وَ ما يمتص العرق مرة بس قطني

[ بتقولون ليه ما قَصيتي التاق ، لأن كان بنيتي ريفيو وَ فيه ناس ما يَصدقون لو ما شافوا اللوغو ]

خُلاصة : لا تشترون برا إلا من ماركة رياضية حتى لو خصصوا كولكشن رياضي ، لا أويشو وَ لا زارا وَ لا ومن سيكرت وَ لا إتش آند إم ، وَ الفرق أثناء الإستخدام يتضح وَ أثناء الراحة وَ لسلامة الصدر ، وَ هالماركات حاطين هالبرا جانبية للرقص ، لتمشية الكلاب وَ الطلعات النهارية وَ الشاليهات .. إلخ  مُش مُخصصة لتمارين قوية .. إلخ 

كيف أعرف مقاس برا الرياضة المُناسب ؟!
للأسف كل براند لهم مَقاس خاص لهم حسب تجربتي ، وَ ببعض القصات يلزمها دَقة أكثر
فأفضل حل تدخلين الموقع إللي حابة تشترين منه وَ تشوفين الـ Size Guide ( جدول المقاسات ) ..
وَ تمشين على خَطواتهم وَ هذا مقطعين يوضحون لكم

بحال إحترتي جداً بمقاسك ، حددي أولاً نوع تمارينك وَ بعدها البراند نفسه راح يحصرلك المقاس المُناسب لك 

لأن بعض المُوديلات خلاص مَعروفة لحجم صدر مُعين ، مسألة تعود وَ راح تعرفون وَ للأسف المحلات هنا ما تسمح لك بالتجربة خاصة مثل نايكي وَ أديداس وَ ريبوك إلا إذا كان المُحاسب متساهل مَعك ، يسمح لك تروحين البيت وَ ترجعين لأن ماعندهم غرف للقياس وَ أويشو ممنوع التبديل منعاً باتاً أصلاً ما نبيه بالحسبه 

غسيل البرا الرياضي ،’
حافظوا عليه أثناء الغسل مثله مثل البرا العادي وَ مع ذلك أقروا تعليمات الغسل إحتياطاً ، ما تَكوينه وَ لا تجففينه بالغسالة وَ ما تغسلينه بمبيضات 

مثل ما برا الرياضة أخذ مَني هالطول وَ هالوَقت بالشرح وَ التفصيل وَ كثير مَستسخفينه
تتوقعون الرياضة الجد كم بتاخذ وَ بقية التفاصيل ؟! عشان كذا المواضيع الرياضية مُش مواضيع سهلة أو تافهه تتكلم فيها بعشوائية بدون إهتمام .. لكن عَندي أمل إن كل وحدة فيكم تنزل السوق تَشتري لها برا رياضي وَ أوعدكم بتكملة الأساسيات المُهمة بالرياضة وَ بعدها ما راح تضطرين تلجأين لأحد ، بتصيرين تشغلين المَقاطع وَ تعتمدين على نفسك ، لأن أساسك صَح