هل أصبحت النكبة السنوية لأبطال الديجتال وحميلة المايكروفونات ؟

يعني انا إلي 3 أيام بفكر اكتب أو ما أكتب  في تسلسل الأحداث الدارمية الي بتصير عنا سنوياً ما قبل يوم 15-5 ، وما بعده بيومين.

المشهد1 : حشد ودعوة والبعض بسميه "يوم غضب".

المشهد 2: سيارات بتلف بالشوارع للدعوة وبوسترات ( الله أعلم قديش مكلفة مصاريف)

المشهد 3 : ابطال الديجيتال الفيسبوكيين يبدأون النزال والمعركة. ( من صور ، ومشاهد ، وهاشتاج، وسلفي ، وقصص ما انزل الله بها من سلطان ).

المشهد 4: اليوم المنشود ( الي هو يوم نكبتنا ) فوضى بامتياز، فرصة المدارس بتروح، فرصة المؤسسات الرسمية تروح،  ( طبعا مع احترامنا لكل من شارك بجدية ولكل من نظم )،  على اساس المشاركة بالفعاليات الرسمية.

المشهد 5: صور ما هب ودب من أبطال الديجتال وترتفع وتيرة التهديد للكيان المغتصب.

المشهد 6: شباب بعمر الورد  بتفهم انه معركة ( الأرماجادون ) بدت، وأنه ابطال الديجتال إلى فوروا دم هالشباب بشعاراتهم المقاومة (يوم الغضب، فلننتصر لاسرانا، فلنزلزل الارض من تحت أقدامهم) ( هم أبطال ديجتال ، يعني لن يتحرك من خلف شاشة الكمبيوتر )، وأن من يصدح من وراء المايكروفونات في دوار المنارة لن يتنازل ويوسخ بدلته وكنتدرته والوصول إلى أي منطقة احتكاك مع الاحتلال.

المشهد 7: وصول الشباب لمنطقة (عوفر)،  جيش الاحتلال على أتم الجاهزية للتخريب والقتل والبدء باشاعة الفوضى  ( والله من وراء القصد ). وكُثر من هم بحاجة إلى هذه الفوضى التي يرغب بها الاحتلال !!

المشهد 8 : نديمنوارةومحمدأبوظاهر شهداء .(رحمهم الله )   (مبسوط) ؟ شو علمت ؟. شو الهدف يا بطل الديجتال ؟  أحكيلك ليش با بطل الديجتال؟؟  لأنه نديمنوارةومحمدأبوظاهر أوعى منك، ولأنهم أشجع منك، ولأنهم بفهموا بقضيتهم أكتر منك.

السؤال 1 : هل انتهت فعاليات النكبة يعني خلص خلصنا إلى علينا "انتكبا" وخلص وعملنا المهرجان المعتاد  وفقدنا شهيدين بعمر الورد ؟

السؤال 2: أبطال الديجتال بعد يومين فقط ( شو اخبار النكبة ؟ ولا خلص خلصت مع فوز اتلاتيكو مدريد على برشلونة ) ؟

السؤال 3: لماذا هذا العبث بأرواح الشباب ؟

السؤال 4: هل السنة القادمة سنحيي يوم النكبة بنفس المشهد ؟

السؤال 5: طيب شو اخبار الاستيطان والجدار والاسرى والحواجز و... و ... و ....– المقاومة با بطل الديجتال وحميلة المايكروفونات مش حكي .. المقاومة إذا بدك تروح تشوفها، روح شوفها في القدس وبلعين والمعصرة والأغوار وام سلمونة وشارك فيها اذا بتحب !! بس ما تزاود.

السؤال 6: النكبة السنوية ( شهيدين ، وعدد من الاصابات ) ؟؟؟ هذا هو ؟؟ خلصنا فعاليات ؟ طب ليش مش كل يوم نكبة ؟

السؤال 7: ليش عوفر ؟؟ شو الهدف ؟ واذا اتدخلت السلطة وحطت حاجز بتطلع عميلة، واذا ما اتدخلت برضو عميلة . ووينهم ولا بس بدهم ولاد الناس يموتوا.

سؤالك الأول يا بطل الديجتال وحميلة المايكروفونات شو ؟؟؟