حِكايِة أبو سَرْحانْ والثعلبِ الألْعُبانْ

تابعنا أيضا عبر انستجرام instagram/alwatanvoice

بقلم:آصف قزموز

كلابُ الحيِّ شَبَّتْ في رُبانا// وبعضُ العُرْبِ قَد شَدُّوا وِثاقِيَا
ربيعُ العُربِ والرماحُ تَناهَلَتْ// تُبَدِّدُ حاضراً وَتُشْعِلُ ماضِيَا
خُصُومُ الأمسِ أضحَتْ لي حليفاً// وخَصْمُ اليَومَ يَستَسقي مُصابِيَا
الكُلُّ ينهَشُنا ويَنْكُثُ عُشَّنا// لن يُصلِحَ العطاَّرُ ما جَرى لِيَا
الحُرُّ يَرزَحُ بينَ يَدَي جَهولٍ// والخَصْمُ قاضٍ والضحيَّةُ جانِيَا
بُغاثُ الطيرِ تَنقُرُ في عيوني// ورب الكون قد خَلَقنَ سواسِيَا
كلاب النارِ تَنْبَحُني غريباً// وَتَنهَش في لحمي وكل ما لِيَا
ونعيقُ غِربانٍ من كل حدبٍ// البومُ لَن يَصْلَح إماماً شادِيَا
قولوا لمن طفَحُوا عليَّ هَوْناً// نحن الحجارة والبقيَّه الباقِيَا
قولوا لكل من نشَبوا بلحمي// أنا لستُ قاصراً أوسَبياً سابِيا
قولوا لمن شرِبوا البحار برشفةٍ// سأجعل بحراً من دمي والساقيَه
قولوا لمن فَصَل الرِّكابَ وهزَّني// لن أبْرَحَ الرَّكْبَ سِراًّ أوعَلانِيَه
يا باعِثَ الحُبّ والآمالَ فِينا// كُل الثعالبِ تُوغِلُ في دمائِيَا
يا سيد السيف والرايات فَخْراً// تبقى البلادُ هيَ العزيزَه الغالِيَا
سلامٌ على الأوطان لما تناوشَتْ// وتَجَبَّروا في عظيمِ مُصابِيَا
قسماً بربك لن نحيدَ يوماً// ولن يكُون لهم سَهلاً قِيادِيا
قالوا بْقَديمِ الزمانْ، الذيبِ الحَجَّ ابو سَرحانْ. إمْقَضِّي كل اوْقاتُو، قاعِد بِحْرُث بِالبِستانْ. تحت اشجار الزيزفون، يِتْفَيَّا بين الأغصانْ. وِالثَّعلب بِتْنَطْوَطْلُو، عاملُّو قِرْدُ وْسَعْدانْ. وِامْكشّر عن أنيابُو، بِلحَس ثِمُّو ابْطَرْفِ لْسانْ.
مهموم وشاغِلْ بالو، بأمرِ الثعلب الخَواَّنْ. الثعلب مِشِ مْخَلِّي، ولا حظيرِة خِرفانْ. وِمْصَحِّي كل البلد، مِنِ ازْلامُ وْمِن نِسْوانْ. رِيتُو يِضحك بَلا اسْنانْ، واشُوفُو بَلا خُورانْ. هُو اللي بْيِشْعِل بلحَرْب، ويْهَدِّدْنا وْهُو زعْلانْ. وْتَعْ وِتْفَرَّج يا سَلام، هَدَّا البُلْبُل عالرُّمانْ.
نَط اخونا ابو سَرحان، بِدُّو يِعطي الثعلب دَرسْ. حَلَفْ بِتْرابِ جْدودوا، راحْ يِهْرُسلو عَظمُو هَرْسْ.
رَصَد كل المنطقَه، والأخطار المُحدِقَه. وْنَشَر افْخاخُو وِعْيانو، تَحتِ الشمسِ المُحرِقَهْ. وينَك يا أبو لِحصين، عامِل قائِد مَنطِقَهْ؟!
حَلَف ما يِئْذي إنسانْ، وْما يِرْضَخ لأِيٍّ كانْ. وَلا لَنَتنياهو، لأنّو واحَد عَيَّانْ. بالدقيقة وِالسَّاعَهْ، أخَذِ الخُطْوِة الشُّجاعَهْ، يا حَنَّانُ وْيا مَنّاَنْ، خَفِّف ضَغْطِ الأمريكانْ.
اسْتَنَّى اليومِ الثاني، زَيِّ الفاتِح دِكانِهْ. تا يِصطاد ابو لِحصين، وِيْغنيلوا الأغاني. على الماني عالماني، قتلني وْعاوَد رضاني. يِلْعن أبو الثعالِب، واحَدْهُمْ قَبلِ الثَّاني. ما تْخَلُّونا يا إخْوانْ، نِحْلَم بِأكْلِ الرُّمانْ. مِشْ مُهِم الطَّعمِيِّهْ، حامضْ حِلُو لَفَّاني.
هَبَّتِ الريحِ وِالغُصُنْ عَ امُّو مايِلْ، وِطْيُورِ الغابْ عَمْ بِتْحَلْحِل جَدايِلْ. أبو سِرْحان عَمْيِترَبَصْ ثعالِب، فَتَّش وِاتْفَقَّدِ افخاخُو وْماهُو طايِلْ. شو هاللي صار يا عمي أبو سِرْحانْ، أبو لِحصين عَم بِيْسَوِّي الهَوايِلْ.
أبو سِرْحان مِن فَرْحُو قَعَد يِشْرَبْ، لَمَّا انُّو شافْ بِإيدو انْصادِ الثعلبْ. وَلَّعِ النار عَم يِستنى باللحمِه، صوفاتو صارِن مِن لَحْمُو وْجِلْدُو أقرَبْ. الذيب صاح يا عالَم وِقْعِ الثعلبْ، لَويْنِ ايْروحْ، مني ما إلُو مَهْرَبْ. اتْفُو على الزمان اللي خلَّى ثَعْلَبْ، يِلْعَب بِعَقلِ الناس وِالقَفا مَضْرَبْ. وِقِع بِطوقِ الفَخ وِالوضِع أغْرَبْ، بِيِتْبَطَّح لَبُو سَرحان وْيِتْدَحْلَبْ. ناويلو كالعادِه على مْصيبِه، مع انو ما بْيِسْوى كَلِبْ أجرَبْ.
أعطى لِوْعودِ بِخِرفان وأرانبْ، اللحِمْ هِرِشْ، وِالوَبِرْ مِنُّو ذايِبْ. اتْجَرَّب الثعلب بالناسْ الْحَسايِبْ، وَعَد بالدُّولِه وِالشَمِلْ لَلِّي غايِبْ. أبو سِرحانْ حَذَرُو وِتْحَلَّفْلُو، قاللُّو اصحى تِحلَم إنِّي أغَيِّرْ صايِبْ. أبو لِحصين سافِل وأصلو عايِبْ، بَطَّلنا نِعرف كيف بتيجي المصايِبْ. غنينا وقُلْنا من كثرِةِ المصايِبْ،" يا أهلِ الدار طلوا طلوا الحَبايِبْ، شَعلاني النار وِالسكر قَلبُوا ذايِبْ.
جَلَس لِثنِين يِتْفاوَضُوا بْصَراحَهْ، أبو لِحصين مِشِ مْخَلِّي وقاحَهْ. واحَد سيجارَه وْتِعْسيلِة عَ تُفاحَة، وِالثاني لاطي وْسارِقْ مِنُّو القَدَّاحَهْ. بَس اللي ما يِهْوَى كَحيلَ العِين، عُمرُو بْحَياتو ما راحِ ايْشُوفِ الرَّاحَهْ.
أبو لِحصين طَلَبْ تا نِنسى الماضي، وصَداقَه اتْكُون عالثِّقَة وِالتَّراضي. وِوعود بالفَرِو والأرانب، وإنو لِوْعود ما بِتْروح عالفاضي. ما دام أنا وِانتي وِشَريكي راضي، يِضْرَبُ وْمِيْت يِضْرَبِ القاضي.
فَكَّر الذيب بعِد سماع الثَّعلَبْ، وِاستَبْعَد إنو يكون هالمَرَّه مَقْلَبْ. وقاللُّو يابو لِحصين في عندي شَعِبْ،إلو أرِض وِحْقوق، ما إلَكْ مَهْرَبْ.
الثعلب قال جَهِّزْلي هالِاتفاقْ، لَو بِدِّي أزْعِلْ مِيتْ قاقُ وْقاقْ. بدي أوقِّع عاللي تِطلُبُوهْ، وْنِمشِي بالسَّلِم عالقَدَم وِالساقْ. ما تْخَفِشْ في عندي قانون ومِلتِزِمْ، وِاللي مشْ عاجْبو عالقَفا مُطراقْ.
رفع الذيب راسو وِاتْبَسَّموا لِثْنِينْ، وقالُّو خَلَص وَثقانْ يا أبو لِحصينْ. وِبْدون شْهودْ وَقَّعوها الطرفينْ، من فوقِ الشَّجَر شافِنْهُمْ حمامْتينْ. ما فِشْ داعي حَدا يْصُفْ عا الجَنْبِينْ، تانشُوف لِمْعَرَّصْ أبو لِحْصينْ. بيجوز يِوْفي وِالوَفا عالدِّيْنْ، مع انُّو ميخِذ كل اشروطو وْشَحْطِتِيْنْ.
بَعِد ما فَك الفَخْ عن إجْرُو بْجَسارَهْ، وِالثعلب وَقَّف صافَحُو بْحَرارَهْ. قالُّو يابو لِحصينْ ما تِنسى الوَعِدْ، بلاش اتْرَجِّعنا لَضَرْبِ لِحْجارَهْ. كل لِحقُوق بِدَّكْ تِدفَعِلنا، على دايِر مَليم وْكل بارَهْ. أقسَم الثعلب بْرَحْمِة ضميرو، بِعْيون ماكْرِه وْتِقْدَح شَرارَهْ.
غادَر أبو لِحصين يِتْحَسَّسْ جِراحُو، وِيْفَكِّر كيف بِدُّو يْشِن غارَهْ. اتْلَفَّت على الذيبْ وِتْحَدِّث بِسِرُّو، مسكين أبو سَرحان يا خْسارَهْ. وَقَّف عَ راسِ التَّل يِتباهى بِحالُو، وْلَبُو سِرحان تا يِبعَث إشارَهْ. وْصَرَخ بِعِلْوِ الصوتْ لا تستَنى مِنِّي، أي التِزام يا راعي الشَّطارَهْ. هذا حَكي وَرَق وِالْعِمْلِه تَنَك، زَي الإذاعَه بَعِد كُل غارَهْ. لازم نْقُول وِنْكَرِّر وِنِحكِي، إني خَصْمُ وْحَكَم حَمَل صُفَّارَهْ؟!!
وِاتْبَرَّمِ الثعلب وْدارِلُّو قَفاهْ، ويغيظُهُ وِيْحَرِّك لَهُ رَدْفاهْ : إحنا اللي ما بِقْدَر علينا حَدا، ولا بِعْرِفنا غير الله بْسَماهْ. وَلْكُو اللي فات منكُم قديمُو تاهْ، لِحصيني ما بْيِلْعَب عليْها شاهْ. إحنا اللي ظلينا عَ دربِ جْدوددنا، وِنتُوا اللي خَلِّيتُوا بِكُل جاهْ. إنتَ اللي شَعبَك بَيَّتْ عَ نَجواهْ، حَمل فيك الأمَل وِالحُب يِتْرَجَّاهْ، رَباَّهُ يا رباَّهُ يا رباَّهْ، أفرِغ صَبْرَك علينا وْلا تِنساهْ.
العالِمِ اتْبَهْدَل قضى بالتِّيهْ، وِالجاهِلِ اتْأسْتَذْ على مْرَبِّيْهْ. جُرذان مع غِربان تِتْطاوَل، بَس اللي ما عِرْفِ الصَّقِر بِشْوِيْهْ. وِاللي ما بْتِحْزِرْ عَليْهْ لا تِبْغيْهْ، أما السبِع عالموت بِتْلاقِيْهْ.
[email protected]