نشطاء الاسماعيلية يخترقوا اعتصام رابعة العدوية"رجعولنا السادات نرجع لكم مرسى"

دنيا الوطن-الاسماعيلية - تامرالجندى
كشف "كرم التركى" المتحدث الرسمى لائتلاف25 يناير الاسماعيلية رحلتة بعد ان تسلل الى داخل اعتصام رابعة العدوية واكد عدم صلاحيتة للآدمية واستهل حديثة قائلاً :-انا
 انهارده كنت ف رابعه العدويه قولت اروح اشوف الناس دى ع الطبيعه المهم ركبت نزلت ف رمسيس انا اصلا ماعرفش فين رابعه دى فسالت قالولى عربيات رابعه واقفه بره فركبت ومشيت بينا العربيه واحنا ف الطريق عدينا ع المنصه اللى السادات اغتيل فيها فترحمت عليه وقولت انا رايح اشوف اللى قتلو السادات دلوقتى ولسه مشاهد اغتياله بفتكرها وهو واقف والراجل اللى جرى نحيه المنصه لقيت السواق بيقول رابعه اهى ماتخيلتش خالص انها ع بعد امتار من منصه اغتيال السادات فاستغربت المهم انا شايفهم من بعيد فروحت عليهم اول ما قربت معرفش ليه حسيت ان خايف بجد فقولت ادخل
ولا لا ؟؟؟ المهم قولت انا لو رجعت هيشكو فيا وممكن تحصل مشاكل فروحت هناك فواحد قالى هات بطاقتك قولتله انا معايا الكارنيه بتاع الجامعه والرخصه قالى هات فشاف كلمه هندسه ف الكارنيه فأبتسم وقالى ايوه كده عاوزيين الناس اللى زيك معانا هنا كتير فقولتله انشاء الله فدخلت مكملتش متريين لقت تفتيش فقاله لالالا سيبه دا راجل ف هندسه مافيش خوف منه قاله لا هفتشه بردو المهم اتفتشت ودخلت اول حاجه شوفتها ف وشى حمير وحصنه طبعا والريحه فظيعه ومن ع شمالى ناس نايمه وع يمينى ناس قاعده وناس نايمه المهم كملت ف المشى لغايه ما وصلت للمنصه بتاعتهم فبصيت ع
العماره اللى ادامها عشان اتاكد ان هيا دى اللى ف التليفزيون ولا لا فعلا هيا وكما تخيلتها كمان المنصه عباره عن منصه حفلات زى اللى بنشوفها ف حفلات منير وكده اكن عمدان حديد وكشافات اضائه عليها من بتاعت الحفلات فبصيت وراها عشان اشوف الكاميرا اللى بتصورهم تقريبا بتكون ع المأذنه بتاعت الجامع رابعه المهم وقفت شويه فقولت لواحد انا عاوز اغسل وشى من الحر قالى امشى هناك وخش يمين ناحيه الجامع هتلاقى كل حاجه ومشيت ويارتنى ما مشيت بين المنصه والدخله بتاعت الجامع حوالى 30 متر اول مادخلت يمين اول حاجه شوفتها عربيتيين بث مباشر اللى هما سرقوها من
التليفزيون المصرى محتوطين ف الدخله الصغيره دى ومكتوب عليها اتحاد الاذاعه و التليفزيون المهم كملت لقيت ع شمالى ستات نايمه وكان ف منهم صاحى والدنيا كانت زحمه ف الطريق ده بغض النظر عن الاعداد مش هقول عليها عشان ممكن حد يقول الجو حر والدنيا صيام المهم دخلت عشان اغسل وشى لقيت حوالى 15 حنفيه وكل حنفيه عليها طابور حوالى 20 واحد فقولت كده مش هاينفع فطلعت ادام اشوف الحنفيه دى ايه نظامها عباره عن سرسوب ميه والله العظيم مامكمل سرسوب كمان من كتر الضغط وكميه حشرات دبان ع ناموس ع حاجات غريبه انا قرفت قولت لا مش هغسل وشى ف الريحه دى ومع الناس دى
فقولت لواحد هو فين حمامات الوضوء قالى هيا دى وف حمامات تانيه ورا روحت ورا وشوفت منظر كنت هرجع جايبيين زجاجه كبيره اللى هيا بتاعت الكولديرات الجديده دى ومعلقنها و مطلعيين منها ماسوره كبيره ع الحيطه و اللى عاوز يعمل حمام من الرجاله بيعملها ع الحيطه وبعد كده بينضف نفسه من الماسوره اللى خارجه من الزجاجه وعامليين فروقات باكياس سوده نايلون اكنها مراحيض زى مابيسموها المهم الريحه هناك انا كنت هعيط بجد من القرف و الدبان والحشرات وكنت هعيط ع الناس دى صعبو عليا مش عارف ليه بيعملو كده ف نفسهم المهم جريت وطلعت من الارف ده فلقيتهم بيقولولى
تانى اثبات وتفتيش طلع ان ده مدخل تانى فروحت للمنصه كانو مشغليين اغنيه مصر اسلاميه الغريب ان كل اللى هناك ياما عرب او فلاحيين ماشوفتش حد زينا او من مدينه من لغتهم ومن لبسهم وناس عماله تلعب عصيان مع بعض وبمناسبه العصيان رابعه مليانه شوم .... المهم وقفت ف فى واحد تقريبا ادى او اكبر منى شويه بيقولى انتا منين فقولتله انا من رمسيس فقالى منين ف رمسيس فهتفت مع الناس عشان مكنتش عارف اقوله ايه هربت منه يعنى المهم لقيت خرطوم ميه اتفتح ف وشى فجاه فبصيت بسرعه اتاريهم بيرشو ع الناس ميه وهما واقفين بعد شويه لقيت خرطوم ميه ف قفايا طلع نفس الحمار
بردو فقولت مش مهم اهو بيطرى الجو فطلع واحد شاعر قال شعر فيما معناه ان ليه ياسيسى انتا خايف تنزل تمشى ف الشارع زى مرسى ما مشى ف الشارع ومحتمى ف عساكرك المهم مشيو ف مسيره جوه الاعتصام بنفس الاغانى فجه شيخ شكله فلاح فقال انتو تعرفو هتلر قتل اليهود ليه قتلهم عشان شعبه وتعرفو السيسى بيقتل شعبه ليه عشان اليهود انا طبعا عامل نفسى اكنى اخوانى صميم قولت مهما حصل مش هنطق المهم و احنا ماشيين لقيت رشاش ميه جه ف وشى فجأه بس مش ميه طلع ديتول اتجننت انا بئا فلقيت واد بيرش فزعقت قولتله ايه دا ياعم بصوت عالى ادام الناس فقالى انتا اول مره تيجى هنا
كنت عاوز اضرب نفسى بالجزمه انى اتكلمت فقولتله لا يامعلم بس ابقا نبهنى عشان دخل ف بؤى رشلى هنا شويا ياعم ام راشش ع ضهرى و كل جسمى كنت عاوز امسكه اقتله واقوله هو انا حشره يا ابن ستين كلب الغريبه ان الناس مبسوطه منه وبيجو ادامه عشان يرش عليهم ... التليفون فصل شحن ففضلت اسال حد معاه شاحن قالولى ف الخيمه اللى هناك فروحت اعدت شويه كان موجود حوالى 5 فواحد منهم بيقول السيسى ده مخنث فرد عليه واحد قاله ليه قاله طريقه كلامه زى الحريم شوفت لما قال احنا ايدينا تتقطع ولا تقتل مصرى ففضلو يتحكو ع السيسى وانا هموت بس مش عارف اعمل حاجه فرد واحد عليه
قاله لا ياعم دا ابن جنيه بيضحك ع الشعب عشان يبقا رئيس فرد التالت قال و البرادعى ده عميل امريكا الاول ف المنطقه فقررت امشى قبل ما امشى كان ف واحد اعد جمبى فقولتله صحيح ان هما خصصو اماكن للناس المتجوزه قالى اه فعلا ليه؟ قولتله اصل اختى الكبيره كانت عاوزه تيجى هيا و جوزها و عيالها (((مع العلم انى اكبر اخواتى))) قالى اه فيه قولتله فين قالى طلاب جامعه الازهر اللى مالهومش اماكن ف سكن الطلاب كانو بيسكنو ف عماير ورا هنا فدلوقتى فاضيه خصصناها للناس المتجوزه قولتله قشطه بس فجيت اخرج الخروج من بةابه تانيه خالص عباره عن طوب مرصوص ع شكل حمايات
جيش او حوائط دفاعيه حاجه زى كدا وانا خارج لقيت يابانيين بيصورو او تقريبا صينيين والله زعلت انهم بيصورو القرف ده...... بس ده كل اللى حصل بجد الناس دى مش عايشه عيشه بنى ادميين خالص وذنبهم ف رقبه مرسى بس المهم انى فلت منهم بالعافيه الحمد لله واللى اقدر اقول لهم واختتم حديثة بالقسم "رجعولنا السادات نرجع لكم مرسى"