رسالة من موظف حكومي برام الله متقشف ومتكشف

انا انسان طول عمري طموح وبحب الحياة كان حلمي الكبير " والي هو حق بالاصل " اني ادرس واتخرج والقى الوظيفة بتستناني واعيش شبابي مثل شباب هالعالم اطش واسافر وما اخاف انو يفوتني قطار العمر لاني كنت بفكر انو في حد حامل همي وهم غيري من شباب هالبلد وبما انو في عنا حكومة وتشعريعي ومؤسسات كثيرة ما خفت اني اقعد بالبيت وما القى شغل فحكيت يا ولد انت هلا ادرس واتمتع بايام الجامعة وما عليك الحكومة مجزة فرص عمل للجميع والاسعار رخيصة امتى ما بدك بتبلش تبني او بتستاجر الايجارات باللد رخيصة كلها سنة زمان من معاشك بتبني بيت منيح وبتجوز شو بتكلف الجيزة عنا ولا شي راس مالها اكمن الف شيقل وبجهز امورك يعني سنة بتبني وسنة بتجوز ..
 
والله انا بيني وبينكم ما صدقت احلامي كثير اتخرجنا من هالجامعة وحكيت بتريح شهر يعني مهو مش معقول الواحد يتخرج ودغري ينزل عسوق العمل المهم بعد ما اتريحت وزهقت من قعدة الدار حكيت خليني اروح اقدم لوظيفة ، فتحت هالجريدة كل يوم بنزل 10 اعلانات توظيف بمؤسسات الحكومة وانا اقدم وما اجاني غير ادفع مواصلات عرام الله رايح جاي عالوزرات اقدم واقابل فكرت الخلل في انا بس يا عمي غيري جاب بالتوجيهي 60 ويا دوب عالحفة بالجامعة واتوظف واخذ مدير شو القصة يا جماعة اكيد بحلم ..
 
حكيت اتركك من الحكومة وخلينا بالخاص في مصاري وفي بركة والله وقدمت وقدمت والقصة هي هي ما في فرق اخيرا القينا وظيفة مش عالشهادة وراتب ممتاز " 1200 شيقل " بالشهر قلنا " العب بالمقصقص لا يجيك الطيار " والله وهالمقصص سحبت معو اربع سنين وطبعا بدي استنى الحكومة بلشت ابني اسمعت عن القروض ورحت عمؤسسات بما انو البنوك ما بترضى تعطي غير الموظفين الحكوميين بهالبلد واخدنا اكمن دولار وبلشت ابني ببيت مثل هالبشر والديون تتراكم والله اشي بقهر صاحبي عمرو ما قدم لوظيفة اله معطيه اجتو وظيفتو للدار انا بعد اربع سنين وحالي احسن من كثير شباب بهالبلد اتوظفت حسيت انو الحلم بلش يتحقق ...
 
داومنا مثل ابو الشباب مكتب وتلفون وكمبيوتر وانترنت  ودخلنا عالم الوظيفة الحكومية المرّة بلشنا نسال كيف بزيد الراتب وكيف بترقى الواحد سهلوها بوجوهنا المهم انو يكون الك سنة بعدها الفرص متاحة الك وكل واحد يحكي ترجبتو القاسية ومعاناتو لحتى ارتفع راتبو اتخيلوا واحد الو 14 سنة بقبض 2500 شيقل ومعاه بكالورويس وواحد الو سنيتن وبقبض 4000 شيقل ومعاه بكالورويس كمان !!

خلصت السنة واخدنا قرض نكمل هالبيت وصار علي دين ب30 ضعف راتبي قلنا معلش يا ولد الحياة بدها الديون وسخ ادين بتروح اخرتها بكرة بتاخد مدير وبصير راتبك 4000 شيقل وبترتاح وخبطناها خطبة لا حدا حوش ..
 
المهم لا في مدير ولا رئيس قسم ولا شي الموضوع معقد وما عنا حد واصل يجيب هالحكي بسرعة والقوانين كل مالها ضدنا ولا عارفين نكمل البيت ولا عارفين نجوز شو العمل بنباطح بالمسؤولين وعالفاضي والمشكلة انو المسؤول بوقف وبصير يحكي انا نقابي وانا مع حقوق الموظف وانو يرتقي بوظيفتو بس الوجه الاخر لحكيو قرار اصدروا بتدمير الارتقاء الوظيفي لا وشو كمان بدهم يزيدو ضريبة الدخل ماشي انا موظف دخل محدود طيب بفكر " مجرد تفكير والله " انو اصير دخل متوسط بس خايف من الضريبة لانو انا شو بضل من راتبي 600 شيقل وكيلو الجاج ب 17 وجرة الغاز 70 وكيس السكر ب 200 شيقل والطحين...

 والبنزين بشم ريحتو بس بالكازيات لانو ما في معي اوكل لاشتري سيارة !!
 
يا جماعة اشي بزهق طلعت رواحنا كل اشي بنحطو بشماعة الاحتلال يا اخي الاحتلال قلك اعمل الراتب الاساسي للموظف الي معاه بكالوريوس 1700 شيقل ولاحقنا عالعلاوات والمواصلات بدكم تسحبوهم شو بدكم بدكم نشحد ولا نهاجر من هالبلد ..

احنا زهقنا .. وطلعت رواحنا " غلاء معيشة ، رواتب قليلة ، مواصلات مرتفعة ، اسعار بالعلالي ، وضع سياسي زفت ،  ، مشاكل ، ناقصنا شعارات وخطب من المسؤولين اي طلعت رواحنا يا اخوان ... وشو تقشف ما احنا متقشفين ومتكشفين !!!

بدنا حل
أبو كرم