لا عرف ماذا أفعل ؟

السلام عليكم ...
اخواني اخواتي بصراحة حابة احكيلكم مشكلة خاصة فيي انا ومش عارفة شو اعمل فيها
انا الي عم وهو اصغر واحد باعمامي واتوفى من شي سنة ونص وكنت متعلقة فيه كتير يمكن لانه كان قبل ما يتزوج ييجي كتير عنا ورباني وبحبني كتير وهو بمثابة ابي وبحبه كتييير
وهو اتوفى بسبب مرض السرطان الله يبعده عن الجميع اصيب فيه من بعد ما طلع من سجون الاحتلال بشي 6 اشهر
وما بنعرف هل هو من سوء معاملة اليهود او انه اختبار من الله سبحانه وتعالى
انا كنت احب عمي كتير وقبل وفاته بيوم قعد يوصيني وصايا يمكن قعد ساعتين وهو يحكي معي انا وحدي حكالي لا تقطعي ولا فرض بالصلاة وحاولي تصومي اثنين وخميس قد ما تقدري ووصاني ع اولاده و ع مرته ووصاني لما اكبر ادرس محاسبة متله او تمريض
حكتله عمو ليش عم تحكي هيك حكالي لاني حاسس انو خلص عمري انا صرت ابكي واحكيله لا عمو انشالله الله رح يطول بعمرك وتعيش وتفرح باولادك حكالي من تمك لباب السماء
وحكالي بس لا تبكي ولا بزعل منك حكتله ماشي طلعت برا غرفته لقيت مرته عم تبكي قعدت صرت ابكي معها وكل ما نسمعه عم يتعذب ويحكي اه دخيلكم نبكي بزيادة
بس رغم كل هذا هو كان مبسوط وكان يحكيلنا جميعنا لما نكون مجتمعين عنده لا تبكوا علي هذا امتحان من ربي والحمد لله ع كل حال
وتاني يوم كنت بالمدرسة اجا اخي الكبير الي لازم وقتها كان بالجامعة اجا اخدني انا وبنات عمامي من المدرسة طبعا انا استغربت لانو اخي لازم يكون بالجامعة شو جابه ع مدرستنا
نادت علينا المديرة وطلعنا مع اخي بحكيله شو في بحكيلي ما في شي انا وقتها شكيت انو صاير شي لعمي
حكناله عمو في شي حكالنا لأ بس هو حابب يشوفكن طبعا هو كان ميت ولهيك اخي اجا اخدنا من المدرسة
اول ما وصلنا بيت عمي لقيت سيارات كتير وناس بحكيلهم شو في بحكولي عمك اتوفى صرت اصرخ واحكي لا انتو عم تكذبوا علي ومن كتر ما صرخت فقدت الوعي وغميت لما صحوني حكتلهم انتو عم تكذبوا علي دخلت وشفته وبوسته وصرت ابكي وابكي وما استوعبت لما اخدوه وعملوله جنازة جنازة كبيرة كان فيها كل بلدنا وناس من برا البلد معارفنا صرت اصرخ بزيادة واحكي عمو لا تسيبني لا تسيبني وهم يهدوا فيني
وبعدها من يومها لليوم وانا بضل احلم فيه وحاطة صورته معي بتصبح فيها وبتمسى فيها وكل جمعة بزور قبره
بس بصراحة انا كل يوم بحلم فيه ومش عارفة شو اعمل بنبسط كتير لما اقوم من نومي بيحكولي مالك بحكيلهم حلمت بعمي وانا مبسوطة كتير ومرة حلمت فيه وحكالي اطلعي عمرة عني وفعلا بشهر 8 طلعت عمرة بس مشانه
وبس مش قادرة استوعب انه اتوفى وساب وراه ولدين متل الشمعة بوجوهم البراءة
بيكونوا عم يلعبوا برا مع اخواتي واولاد الحارة اول ما اشوفهم واحضنهم بصير ابكي كتير على عمي وخصوصا لانو وصاني عليهم وع مرته

وحاسة انو في شي كاتم ع صدري وما عم اعرف اتخلص منه
حابه انسى ومش عارفة انسى
وحابة اقسى ومش عارفة اقسى
ساعودني
كيف بدي احاول اني استوعب وفاة عمي ؟؟؟
وكيف بدي انساه ويضل ذكراه بقلبي من دون ما ازكر فيه حد واخليهم يزعلوا ؟؟؟
لانه كل ما اتذكره واشوف اولاده عم اتعذب وابكي عليه
وفي النهاية اتمنى ان يدخله الله فسيح جنانه و يوسع قربه ويجعله روضة من رياض الجنة
الله يرحمه ويرحم امة المسلمين الاحياء منهم والاموات يا رب
أختكم في الله:
اســ بنت الضفة ـــراااااء