أنا يتيمة الأبوين وزوجي رجل جائر ولا يرحم.. كيف أتصرف؟!

مرحبا لأحلى موقع بالوجود، اليوم أنا حابة أكتبلكم مشكلتي وبتمنى تنشروها بأسرع وقت ممكن لأني محتاجة لرأي الشباب والصبايا يلي بيتصفحوا موقعكم الكريم خصوصا يلي عندهم خبرة سابقة بهيك مواضيع..

أنا بنت من حيفا عمري عشرين سنة و الحمدلله حلوة ومؤدبة ومتعلمة، أنا متزوجة من ابن عمي من حوالي ستة شهور - هو عمره 25 سنة - أنا بحياتي ما عرفت حدا غيره ومن أنا وصغيرة بحبه وهو ما كان يخلي حدا يقرب علي وعلشان هيك عمي زوجني اياه خاصة انه انا يتيمة الأب والأم وزوجة أبي ربتني ومن أنا عمري سبعة شهور - أبوي كان برات البلاد وتزوج أمي الألمانية ولما رجع جابني معه وأنا ولا مرة شفت أمي ولا بعرف عنها اشي، واسا ابوي متوفى من زمان - هادا زوجي ما بيعرف اشي اسمه حب و حنان بيصبحني وبيمسيني على علقة وبهدلة وكلام مش منيح و من دون أدنى سبب، حتى عمي وزوجة عمي واخواته يلي هني أهله ما سلموا منه!!

بيت عمي كلهن بيدافعوا عني خاصة انو انا ساكنة حدهن بس هني غلبوا معه، آخر مرة عمي وأسلافي أخذوني بالقوة لعندهن علشان أعيش معهن وأتركه لحاله بالبيت وأنا ما قدرت أعمل اشي ورحت معهن، قام زوجي راح جاب الشرطة وقالهم انو ابوه واخواته خطفوني ولما اجت الشرطة عمي وأسلافي طلبوا مني أشتكي عليه وأقول انو هو بيعذبني و بيضربني بس هو كان يقول أنا بدي مرتي ترجع معي وأنا ما قدرت أشتكي عليه.

يعني أنا رغم كل اشي بحبه و متعلقة فيه لأني بجد ما بعرف زلمة تاني غيره - ورجعت معه وعمي وأسلافي حكولي لو بتموتي ما ترجعي لعنا وانسينا، حتى زوجي يعني حكى على عمي وزوجة عمي كلام مش منيح وعايرهم انو هو بيصرف عليهم علشان عمي مريض وما فيه يشتغل ومن وقتها عمي مريض علشان نفسه عزت عليه كتير.

أنا بعرف انو انا غلطانة بس كمان ما بقدر أشتكي عليه، من أسبوع اجت امي يلي هي مرت ابوي لعندي وزوجي هانها وحكاها كلام مش منيح و طردها من البيت وأنا لميت أغراضي ورحت لبيت أهلي واسا أنا عايشة مع مرت أبوي وقلتله ما برجعلك الا لتيجي وتبوس راس وايد امي (زوجة ابي) وتعتذر منها. بس هو مش راضي، زوجة ابي بتقولي اذا انا بدي اياه ارجعله وهي مش راح تزعل مني كرمال انه ما اعتذر لها، بس انا مصرة على رأيي، أنا بعرف انو زوجي ما راح ييجي ويعتذر علشان هو كتير عنيد يعني اذا ما اعتذر من اهله ابوه وامه راح يعتذر من زوجة أبي؟! أنا كتير محطمة نفسيا من جهة انا بحبه ورغم انه بيضربني ويهينني بس كتير مشتاقة له، بس كمان زوجة أبي مش هاينة علي ابدا لانه هي يلي ربتني مع اخواتي رغم انه ابوي الله يرحمه تزوج عليها برا وجابني معه، محتارة أرجع لزوجي بشروطه واعيش معه واستحمله هيك لحد ما ييجي يوم ويتغير؟ او خلص ابقى عند امي (زوجة ابي) واطلب الطلاق واكمل تعليمي، بس مشكلتي انو انا متعلقة فيه لدرجة و ما بقدر اعيش بدونه، ارجوكم ساعدوني

تحياتي
أخوكم
امير الاحساس والطيبة
امير دنيا الوطن
ابو البراء