هل اقطع علاقتي به

انا بنت عمري 18 سنة، محجبة وبصلي كل الصلوات والحمد لله، تعرفت على شب من خلال الانترنت وحكيت معه تقريبا 4 ايام متواصلة، كنت افوت ع الانترنت خصوصي عشانو، وبالوقت اللي يكون هو فايت كان بدو مني اعطيه اميلي بس انا رفضت خفت انو يصير علاقة وصداقة بيناتنا، هو كان كتير منيح معي بحكياتو، الآن بالآخر اعطيته اميلي وصرنا نحكي عالايميل، كان يحكي معي حكي حلو وكنت انبسط كتير، فرجاني صورتو وكان بدو مني افرجيه صورتي بس انا ما قبلت بالاول، حكيت فترة طويلة معاه بدون ما افرجيه صورتي بس بالآخر فرجيتو صورتي مش عارفة كيف قبلت افرجيه .. ضعفت، بس شاف الصورة قللي انك حلوة كتير ومن هالحكي، اتطور الحكي بيناتنا صار يحكي معي حكي مش كل هالقد، وأحيانا كان يحكي معي حكي مش منيح، وانا مش عارفة ليش كنت اكمل معاه بالحديث، والمشكلة اني كنت اتجاوب معو مش عارفة ليش، ومرة قللي بدي اسمع صوتك اجيت قلتولو اعطيني رقمك بتصل فيك ، اتصلت فيه وحكيت معاه واعطيتو رقمي كمان من هبلي .. وصرنا نحكي فترة طويلة مع بعض عالتلفون

الآن في مرة حكى معي حكي مش منيح، وانا ما وقفتوا من البداية بس اتعبت من حكيه حسيت اني غلطتي اجيت قلتلو خلص بكفي، سكت هو وحكالي طيب يلا باي باي بحكي معك بعدين، بعد هالشغلة كانت حالتي النفسية صعبة حسيت اني غلطت غلطة كبيرة، كنت اعيط كتير ودايما حزينة وهيك، اتصلت فيه ثاني يوم وعيطلتو وقلتلو مش لازم كان يصير اللي صار وانا غلطت وكنت يأسانة كثير، هداني هو شوي وحكالي فش انسان بغلطش والانسان العاقل هو اللي بضلش على غلطه وبتوب، قررنا انو خلص منحكيش مع بعض وننهي العلاقة بس للاسف ضلينا نحكي بس اخف من الاول بكثير والحكي كان عادي وفترة المكالمة قصيرة ورسائل وهيك، اتفقنا انو يشوفني بمحل وصار بس ما حكينا وهيك بس شافني بالشارع وخلص بعد ما شافني اتصل في وحكالي انت بنت مبين عليكي هادية انت بنت للجيزة حرام مش فاهمة انا اشي حسيت حالي بحبو كتير اعترفتلو بحبي بس حكالي اهم اشي الآن علمك وبتنسيني اكيد وبتخطبي وبتتجوزي، آخر فترة ببعتلو رسائل بردش، حكالي انا بدي اداويكي وبديش ارد عليكي برسائل، مبارح اتصلت فيه بردش، مش عارفة شو اسوي، خلص انساه واقطع العلاقة ولا شو؟ أنا مش عارفة ليش عمل هيك لو شاب تاني كان ضل يحكي معي ويتسلى، في شباب بهالايام هيك، حدا يساعدني ويقللي شو اساوي ويفهمني ليش عمل هيك ...