بحكولي ليش لسه ما تجوزتي

السلام عليكم
انا بنت فلسطينية مقيمة بالضفة الغربية. من 3 شهور فتت بسنتي ال 28 على وجه الدنيا. متعلمه مثقفه موظفة على قدري مش كتير حلوة ولا بشعه عادية يعني والجمال نسبي بيختلف من شخص للتاني.
المهم مشكلتي باختصار انو الاحلى مني والاشنع مني تجوزوا وانا بقول النصيب, والاكبر مني والاصغر مني تجزوا وانا كمان بقول النصيب. وما خليت ولا وحده من معارفي ولا من صاحباتي الا وجندتها عشان تدعيلي , مننهم اللي بدعولي بعد الصلاة ومنهم اللي بتدعيلي بالعمرة واللي بتدعيلي وهي تولد وكل دعواتهم ودعواتي ما حسنت حالي وكل مالي عم برجع لورا وبحس انو اليأس قرب يسيطر ع حياتي انو كيف بشوف البنات عندهم اولاد وبربوهم وبكبروهم وانا بتفرج لا لاقية انيس ولا ونيس وعمالني بفكر انو بكرة لما اكبر كمان وكمان وين رح اعيش وعند مين من نسوان اخوتي يا الله ما اصعب حياتي رح تكون بس دايما بدعي ربي اني اموت قبل ما اوصل لمرحلة الذل وربي لا يجعل لأي بنت عند أي حدا حاجة يا رب.

المهم انو كل اللي بعرفهم بينظرولي باستغراب وتساؤل انو ليش انا ما تجوزت لهلاء ولا انخطبت مع انو مش ناقصني اشي وتقدملي كتير بس كل مرة ينقطع النصيب لسبب او لاخر.
انا زهقت من كتر ما قلتلهم النصيب النصيب النصيب وبعدين شو اعمل بحالي ععنجد اني قرفانةومالة الدنيا ومن فيها.
ما أصعب انو البني ادم يعيش وحيد بالرغم من وجود الناس حواليه.