بنت من الناصرة : حابي افضفض اللي بقلبي

سلام عليكم لجميع المعقبين
انا قريت كثير تعليقات بخصوص العرب 48 (فلسطيني 48) بشكل عام وعن بنات 48 بشكل خاص ولكن للاسف كلها افتراء عن الحقيقة
في تعقيبات بتبن مدى غيرتكم لبنات 48 في تعقيبات من شباب بتمنوا نظرة منهم وفي تعقيبات اعطتهن اللقب بنات الشوارع الي ما بيجوا للضفة الا عشان يوقعوا شباب الضفة بشباكهم ونسبة قليلة ما بتتعدى 1% الي انصفتنا واعطتنا حقنا انو احنا محترمات حتى لو ماخذين الحرية التامة
الاغلب نسي انو احنا فلسطيني مثلنا مثلكم عم بحملونا ذنب انو معانا هوية اسرائلية وعايشين بين يهود ...مش عارفي ليه عم نتعاقب بشي ما النا ذنب فيو الا انو وجدنا نفسنا بهيك وضع .
كمان ناسين انو منشوف الموت 100 مرة عشان نبقى صامدين بارضنا وما تتاخذ منا. اكيد بعضكوا بقرا بمواقع تابعة للعرب 48 مدى تحملهن للاضطهاد الي بحصل من هدم بيوت من عدم اعطاء رخص لبناء ، لتحويل الاراضي لصالح اليهود ، عمال عم تنفصل من عملها بسبب بسيط لانها بتتفاخر كونها عربية او لانها حكت بالعربي مكان عملها ، ولا مساجد الي اتحولت لكنائس يهودية شو احكي
اذا بدكو تصنفونا يا ريت ما تصنفونا عشان لبسنا في اكثر من طريقة تنصفونا من خلالها
على فكرة احنا حجتنا معروفة ( عايشين مع يهود) يا هل ترى انتو (اهل الضفة) شو حجتكو لما تشوفوا بعض بناتكوا لبسات لبس اليهوديات بتستحي تلبسو ...
وانا كثير باجي عل الضفة بعمري ما شفت بنت من عنا لابسي لبس غير محتشم لانها عارفي وين هي رايحة ... وطبعا مش قاطعات مسافات عشان توقع شباب الضفة بشبابكها لانهن مكتفيات ومقتنعات بشباب بلدنا الي بجننو والعكس الصحيح يعني شبابنا ما بيجوا عل الضفة عشان يصطادوا بنات الضفة لانهن محترمين البلد الي هن فيها وشبعانين ( اكيد راح تفهموها غلط قصدي انو اغلب الشباب مصاحبي ومستحيل يطلعوا لبرة ) ومش من عاداتنا 

نسيت اطمن بعض بنات الضفة انهن يطمنو لانو مستحيل ننطلع على شبابكو مش لاننا متكبرين بس لاننا واقعين لانو فاهمين شو نية الشاب للبنت بتطلع على جسدها او هويتها او اخلاقها وشخصيتها اخر اهتمو

انا اسفة بس انتو الي اجبرتوني احكي واميز بينا وبينكو هيك وبضل فلسطينية واضل بحب كل فلسطيني على هاي الارض ..
ونصيحة هيك اخوية قبل ما تمحوا القشة الي بعيونا يا ريت تمحوا الخشب الي بعيونكو
اسفة اني حكيت بلهجة يمكن الاغلب يستصعبها

باحترام اختكم من الناصرة