ماذا افعل بنفسي

السلام عليكم ...أنا فتاة فلسطينية ابغ من العمر 16 سنة.. ولكني كنت أعيش في النرويج

وعشت في النرويج 5 سنين أو أكثر

وعدت لوطني من شهر يناير الماضي

ولكن عندما ذهبت للمدرسة الحكومية حسيت حالي غريبة

وحسيت انو صعب ضلني في هالمدرسة لانو اسلوب المعلمين والمعلمات عنيف

وما اتعودت على هيك اسلوب

وبعدها بلشت أدور على مدرسة خاصة

وسمعت بمدرسة الزهراء النموذجية الخاصة

وسجلت فيها بس برضو ما لقيت فيه فرق كبير بالتدريس

برضو في هالمدرسة لقيت اسلوب العنف بستعملوه المعلمين مع الطلاب

وما قدرت اتحمل لانهم شديدين كثير وما بستعملوا الا لغة الصراخ مع الطلاب

ما بعرف الصراحة انو انا ليش ما قدرت أتاقلم مع المدارس الي هون

وعلى فكرة لم اقضي في هذه المدارس الا شهرين او اقل

ولكني قدمت الامتحانات النهائية في هذه المدرسة

وقدمت هالامتحانات على اساس انو كان يجيني على البيت استاذ خاص لكل المواد

وللعلم انا انتهيت من الصف العاشر

وهالسنة الصف الحادي عشر

وبلشت السنة الجديدة بس مش قادره اروح على اي مدرسة في هالبلد ..خلص صرت اكره المدرسة كثير طبعا كرهي للمدرسة من تعامل الاساتذة العنيف

بس بنفس الوقت لما اشوف الطلاب لما بيروحوا عالمدرسة بحس بقلبي ندم على اني رح اضيع هالسنين الحلوه من عمري

اختي عم تنصحني اني أروح عالمدرسة ومع الوقت رح اتعود عالمدارس هون .....بس انا بطبيعتي كثير حساسة ببكي من اي شي

وهون المعلمين بصرخو كثير عالطلاب ما عارفة شو بدي اعمل بحالي!!يا ريت لو تنصحوني شو اعمل ..كيف فيني اكمل دراستي..

عقلي مخربط..ما في حد عم يهتم فيني ..أمي ماتت ونحنا في النرويج..هي وحدها الي كانت عم تهتم فيني..

نفسي افتح صفحة جديدة مع هالحياة بس كيف ..عم حس حالي عاجزة عن كل شي..

موت أمي أثر كثير بحياتي خاصة انو امي كانت انسانة حنونة كثيير..وكمان موت ما كان موت عادي ..فجاة مرضت بمرض السرطان وبسرعة كبيرة انتشر المرض في جسمها ورغم المها وتوجعها اصرت تروح عالحج ورجعتلنا من الحج تعبانة عالاخر وبعد ايام من رجعوها للنرويج اتوفت قعدت 5 ساعات عايشة عالاجهزة واحنا مو قادرين نعمل شي وكان فايت الاوان اه ياماما شو مشتقالك ..اشتقتلك كثير ...انتي الحب الاول والاخير في حياتي...يا رب حرمتني من احن مخلوقه بالدنيا...

آآآآآه يا زمن..

نفسي ابلش حياة جديدة وانسى كل احزاني بس كيف

؟؟؟؟؟؟