بكره شوفيرية التكاسي يا ناس

قولوا عني عنصرية.....قولوا عني أرستقراطية......قولوا عني شو ما تقولوا....
أنا يا جماعة بكره شوفيرية التكاسي من كل قلبي وبكره أتعامل معهم، ولهلا كلما بطلع بتكسي بطاوش معه....." يا بينفخ بوجهك سيجارته ...... يا بتم بسب على العالم ......يا بتم بيسألك أسئلة حشرية ..... مفكر حالو ملك الشوارع وكل الناس الي بتسوق حمير ، والله الي بيقول عن هاي المهنة شريفة بيكون غلطان لأنو بعمرها ما بتكون شريفة وزعران هالبلد هما الي ماسكينها.
يعني أنا آخرتني شي يوم يجو أهلي يتكفلوني من قسم الشرطة بسبب شوفير لأنو عنجد عنجد بعض شوفيرية التكاسي برام الله ما بيستحو وما عندهم أخلاق ولا شي بالمرة على الشطب ومتأكدة إني بيوم أدق في واحد فيهم بوكسات مع إنو ما بيستاهل بس هيك ...
ولما ستي الله يرحمها كانت لما تبهدل حدا تقولو مثل شوفيرالتكسي،

ف فعلاً يعني شوفير تكسي مسبة , مع احترامي الشديد للسائقين المحترمين , بس الطالح غلب على الصالح!

ملاحظات عنهم:
- معهم شهادات جامعية ومش ملاقيين شغل على قولتهم طبعاً.

- الشرطة حاطين حطاطهم على مخالفات كلها ظالمة و هم ما عمرهم خالفو و كلو تبلي يا حرام.

- أغلبهم مركبين مراية كبيرة تستخدم عادة في سيارات الشحن الضخمة (طبعاً بركبوها عشان تعطيهم صورة بانورامية واضحة).
- كلهم بحبو الحكي وللت و العجن , واذا ما بترد عليه و بتاخد وبتعطي بلف رام الله كلها.
- من ساعة ما تركب لساعة ما تنزل وهمي يحكوا.... ببلش الحكي عن الجو والحر وبعدين بنوصل لمواضيع سياسيه على المستوى المحلي والدولي والإقليمي ...... وبالاخر بالله اذا احتجتي حد يوصلك وانتي راجعه رنيلي وغصب لازم تسجل الرقم.
- اغلبهم بدخن , واذا بتقلو بدايق من الدخان، بقلك افتح الشباك.
- و اهم شي لما تطلع معو مشان يوصلك على مكان بحملك مية جميلة انه وصلك و انه هو كان رايح يتغدا بس شافك واقف بشمس او المطر حزن عليك و حن و ال حرام خليني وصلو , كأنو طالع معو ببلاش ههههههههه.
- لما تطلع معو صبية بصير عزابي و لسانو حلو و المراية بتتركز على النص و مابمشي اكتر من 40 على السرعة النظامية.
- ولا بعمرهم بعض شوفيرية التكاسي بيصيرو بناآدمين.. يخرب بيتوهم وينكرو كرارهم!! زعران، كتيرين لعي، كتيرين غلبة، الكبير منهم متل ختيار الجن.. همو اللعي الفاضي ويلفلف فيك بشوراع رام الله بحجة انو رجلو بتوجعو اذا طول بالأزمة.. والصغير منهم متل القرد شاقق الأرض وطالع.. دوبو يشرق البنات بالشارع بتطليعاتو ودوبو يآخد بتارو من سيارة اذا ضوالو العالي شي مرة.

والله عندي قصص كتير كتير عن بعض شوفيرية التكاسي..
.صفاتهم ما بتنتهي , بس عنجد انهم ما بستحو

يا أخواني الله يبعد عنا شر التكاسي وشوفيرية التكاسي، آسفة كثير طولت عليكم وأكيد مليتو من قصتي بس والله لأني مقهورة وحبيت أفضفض وتلاقولي شي حل ولو بسيط لمشكلتي مع الشوفيرية.

تحياتي لجميع المعلقين

أختكم Dreama
رام الله