خطوبة النسوان الغزاويات

من المعروف إنو في ناس بتتزوج عن طريق ” العادات والتقاليد” , عاد أنا بدي أحكي عن عادة بعض” النسوان الغزاويات” لمّا يكون بدهم يخطبو لإبنهم الله يحرسه , على أساس إنو ما حدا قدها قال بتخطب لإبنها قال فبتسير “تتشخرط” , “والنسوانة” ..النسوانة “مُفرد نسوان” لمّا بدها تروح تدور على عروس لإبنها بتسير تحكي : والله لأجيبلك أحلى وحدة يما , والله “لأقلّع” عيون النسوان فيها , أقلع بمعنى أحُط أصابعي في عينهم.

خلوني أكمل , بتروح ” هالنسوانة” بتدق باب أهل العروس , المهم بتقعد وبتحكي : والله أنا جاية أخطب لإبني إسم الله عليه ما في حدا قده كامل ومكمل , وابني ما في أحلى منو وأنا بدي عروسة طويلة وشقرا وعيونها لونهم أخضر وشعرها لونه أصفر ونحيفة ما بيزيد وزنها عن ال50 كيلو وبدي ياها “معدّلة” , معدلة هاي بالغزّاوي يعني شاطرة بشغل البيت ,وبتسير تتشرط وتتمرّط ومن هالحكي هاد.

خلوني أكمل , هلأ عاد بيجي دور إم العروس بتسيرتحكي : وأنا بنتي ما في متلها وهيك الله بيخلق جمال وأدب , المهم بتطلع هالعروس تقدم فنجان القهوة أو كباية العصير قال وبتقعد زي الخجلانات بالزبط وبتكون حاطة إصبعها في تمها ” يعني علامات الخجل” , المهم بتسير النسوانة اللي هية إم العريس الله “يفرسه” قصدي يحرسة بتسيرتطلّع في العروسة من فوق لتحت وما بتخلي في جسمها ايشي إلا وبتطلع عليه.

خلوني أكمل , طبعا إم العريس بتحكي للعروس : تعالي تعالي يا حبيبتي جنبي , عاد هية بدها “تدقق” في ملامح وجهها للعروس منيح خوف لتطلع بشعة , ويا ويلها لو طلع “منخارها” كبير ..منخارها يعني بالفصحى أنفها , المهم ويا ويلها لو كانت “حولة” ..حولة يعني بتشوف ” الواحد اتنين” ويا ويلها لو كانت بس بتحكي عن حرف السين “ثين” , يعني هية صح مش رح تضربها بس مش رح تخليها من شرها وهية تعيّب عليها وتحكي عنها للنسوان.

خلوني أكمل , ولا أقلكم بطلت أكمل ,, اللي حابة أحكيه إنو بعض النسوان صاحبات كلام فاضي وتبعات لت وعجن بمعنى اللي بدو يتجوز لا يجري ورا النسوان , واللي بدها تتجوز “بكرامتها” وما بدها تخلي حالها مُجرد سلعة تحاول ما تجاري النسوان كمان , أصلو النسوان لسانهن طويل وبدو ” قص”

تُصبحون على عريس وعروسة..آآآخ بس آآآخ

سيران نوفل