ما بدي أظلم الشاب

أنا فتاة من قطاع غزة عمري 23 عاما، انا بدخل كتير لدنيا الوطن من فترة طويلة و طول حياتي بحلم أتزوج شاب إما يكون يشتغل بسلك العسكرية أو الصحافة لأنهم اكتر ناس بيظهروا علي التلفاز، أكيد راح تقولوا بدكوا تحكو شو هالهبل .. مش راح امدح كتير بنفسي بس اقل اشي بحكيلكم اني جذابة بدرجة كبيرة ومحافظة ما لي أي علاقات مع شباب بالنت أو بغيروا وكمان بصلي هذا من فضل ربي الحمد لله تقدم لخطبتي اكتر من شاب منهم مدرسين انا رفضتهم تقدم شاب من شهرين أو اكتر بيشتغل في الشرطة أنا وافقت لاهلي وكلو تمام اجا المقرود اخويا بيقول لا الا هالشاب هذا مش موافق عليه طيب احكيلي شو السبب ما فش سبب يا اخويا كبر عقلك شو في ما هو من عيلة محترمة مش تاعين مشاكل قال لا الا هالشاب معك تتزوجي أي شاب عل الارض الا هذا، الفهمتوا أنو اخويا عندو نقص بيكره الشاب لانو مميز اكتر منو بس ليش مش عارفة بيكرهوا وهما في اعمار بعض، الشاب أكتر من مرة تقدم لي وأنا صدقوني لقيتوا مخلص لي كتير وبحبني فحبيتوا مش حابة اتخلي عنو وكمان بلغت الشاب عن طريق اختوا بدون ما احكي شو سبب الرفض انو يصبر شوي ومتمسكة بقراري لحتي يوافق اخويا بالرغم من اخويا معارض الا اني راح اتزوجوا لانو شاب مالي عيني اكيد اني جمعت عنو معلومات بكل شي ممتاز اخلقوا عالية ومحترام وكمان هيأ نفسو للزواج مش متل اخويا يلي بيجري هان وهان.. كمان ابويا متوفي وامي مسكينة والمقرود مش مزحزح عقلوا من شهرين، وصار عمري 23 كل بنات عمري في العيلة وصحباتي تزوجوا شو اعمل ما بعرف شو اعمل كيف اقنع اخويا عقلوا صعب ومش راح اظلم الشاب لاني مقتنعة فيه.