فتاة تتسائل بعد أن قرأت زاوية أريد حلاً أين أهلكم عنكم !

مرحبا لكل الصبايا والشباب ..في الحقيقه انا من متتبعي الموقع ولكنني لا ادخل لهذه الزاويه ..

دخلت اليها بالصدفه مؤخرا ..وصراحة تفاجات بما قرات من مشاركات ..

فتيات وشباب .. .. يصاحبوا ويعشقوا ..فتيات تحب اكثر من شاب ..تخرج مع احدهم

وتحب اخر.. فتاه تحب واحد بجيل ابوها واخرى تعشق استاذها..وثالثه تخون خطيبها مع عشيق سابق ..

ورابعه تصف نفسها باللعوب وخامسه تخرج مع حبيبها ويقبلها ..ههه وبكل فخر تشرح !!والادهى انها بتتساءل اذا كانت هذه الخطوه"بكير عليها" يعني ما بتتسائل اذا كانت غلط من اساسها ..طيب حبيبتي وين امك؟؟ كيف ربتك؟؟ ولا مره قالتلك انو هذا غلط؟؟ !!!!!!!!!! اين الامهات ؟؟ يعني هاي اللي طلعت مع من اوهمها بحبه ..فسلبها اغلى ما تملك ومضى ..اين اهلها ..اين امها ؟ اختها اخوها ..اي حد .. بتعرفوا؟؟ لو كانت تربت مزبوط كان ما صار هيك شى ..

هاي البنات اللي كل يوم مع شب ..اليوم بتحب احمد وبتقدرش تعيش بدونه ..وكمان شهرين بتموت الارض اللي بمشي عليها رامي ..واللي بعده بتحلم بعلي باحلامها .....طبعا والشباب نفس الشي.. ما بصير عمر الواحد او الوحده 20 بكونو صاروا مدرسه بالحب والمصاحبه. يا شباب ويا صبايا ..اتقوا الله في انفسكم وابتعدوا عن هذه الافات ..وانت يا

صبيه يا حلوه مره فكرتي ليش صاحبك لما يشوف اخته ماشيه مع واحد بطفر وببهدلها ويمكن بضربها؟؟ فكري شوي بتعرفي ..

واعرفي كمان انو الشب بصنف البنات لصنفين ..صنف 1 للمصاحبات والتسليه .. وصنف 2 البنت المحترمه اللي ما دارت مع فلان وعلان ..لما يقرر يستقر ويتجوز رح يدور على الصنف الثاني وانت بحطك عالرف.

يا جماعه تفهمونيش غلط..انا مش ضد الحب ..فهو اسمى وارقى شعور في تاريخ البشريه ..ولكنه يكون حلو اذا كان بوقته لانو كل شي بوقته حلو ..احكيلكوا عن حالي شوي ..انا فتاه 23 سنه ..على قدر وافر من الجمال والحمد لله ..واخلاقي عاليه وكل

من عرفني شهد بذلك .. لا تقولو معقده ..سمعتها كتير من قريبات وصديقات يعني بقدر اسمي الشعور "اعجاب برىء" انتسى مع مرور الوقت ..

ولا تقولو فش عندك قلب ومشاعر ..بالعكس انا فتاه رومانسيه ومرهفة المشاعر كاي انثى..ولكن عندي مبدا ان لكل شيء اوان ..فقد عاهدت نفسي بان لا اعرف اي شاب الا بالحلال ..لن امشي مع هذا وذاك ..ولن اسمح اهذا او ذاك ان ياخذ رقمي ويهاتفني في منتصف الليل ونتكلم همسا متل الحراميه ..

ساحب فقط عندما يتقدم لي شاب بمعرفة اهلي وحضورهم ..ويتم كل شيء بالعلن ..عندها ساذوق طعم الحب الامن .. بالرغم من انني لا زلت غير مرتبطه لانه لم يتقدم لي شخص مناسب بعد ولكني سابقى كما انا ولن اغير قيمي ومفاهيمي ..ولكن بصراحه شديده اشعر بانني غريبه عن هذا العالم .. فكل من قابلت من صبايا لهن تجارب ولكنني مع ذلك متاكده انني على صواب

لهذا يا احبائي اهتموا بتعليمكو ومستقبلكو ولاحقين عالحب والزواج ..يمكن تقولو اني متحجره ومعقده ..بس لما توعوا شوي رح تفهموا شو قصدت.. وبتمنى انو ما حدا ياخذ المساله بحساسيه وبشكل شخصي ..لاني حبيت احكي كلمة خير وحق ..مع العلم انو الحق احيانا بجرح .. بس الساكت عن الحق شيطان اخرس .. "من راى منكم منكرا فليقومه بيده فان لم يستطع بلسانه وان لم يستطع فبقلبه ..وذلك اضعف الايمان."

طولت عليكم كتير..بتامل اني ما تقلت عليكم .. وطبعا انا راح اخد كل التعليقات بصدر رحب .. بالتوفيق للجميع...

وحده هكلانه هم امهات واباء المستقبل.

فتاه مقدسية