"خليني ابدأ كلامي بايه اللي حصل اصلا عشان كل ده يبدأ"، بهذه العبارة بدأت البلوجر توضيح الحقائق والمعلومات عن زواجها، قائلةً:" الناس اللي شايفة اني السبب في الأحداث دي من أولها طالما أعلنت وروجت عن الموضوع ده من البداية يبقى أستحمل اللي يحصل، مبدئياً كدا أنا مطلعتش أعلنت اصلا عن حاجة من البداية ولا هطلع أشهر حياتي الشخصية عشان مفيش شخص عاقل طبيعي يعمل ده".واستنكرت نعمة، "ولكن القصة اللى حصلت وبتحصل فى كل مرة يظهر فيها تريند جديد هي "جروبات البنات" اللي كلنا عارفينها و بدون ذكر اسمائهم لما لقيت عدد من البنات من الجروبات دي هما اللي بدأو يدوروا ورايا وكأني ارتكبت جريمة بمجرد ما نزلت سيشن الفرح وعينوا أنفسهم قضاة على حياتنا ووضعوا لنفسهم الأحقية انهم يقتحموها ويعرفو أسرارنا وينشروها ويشهرو بيها لمجرد انها مش على مزاجهم ، وبدون اي علم وجهل عن تفاصيل الموضوع بشكل كامل بدأو بنشر اسكرينات وصور قديمه لأكونت جوزي واكونت الزوجة الأولى كمان، ونشروا في كلام مغلوط".

 "خطافة رجالة واني خطفت جوز صاحبتي"، عبارات وضحت من خلالها نعمة ما قيل عنها عقب اعلان زواجها، "الكلام ده كله كان بدون ما أعلن عن اي حاجة اصلا ، ويكأن مشاهير السوشيال ميديا عرضوا حياتهم للمشاع ومن حق أي حد يتكلم فيها لمجرد انهم بقوا مشاهير فأنا زي اي بنت بيتقال عليها كلام غلط بديهي طلعت ادافع عن نفسي واكدب الكلام دا ونزلت صورة لينا احنا التلاته كتبت عليها"عيتلي التانيه" اللي هي كانت "رد فعل" للي هما عملوه اصلا، وغرضها كان علشان أبين ان كل الأطراف موافقه ومرضية".

وأكدت نعمة حسنين، "وجو اني خطفت حد من حد ده كدب الموضوع من قبل ما يتفتح معايا أنا شخصيا كان بعلمها وموافقتها اولا ، ونقطة انها صاحبتي دي كمان تأليف واغلبية الناس اللي متابعاني عارفة صحابي بالظبط، وأنا معملتش حاجة غير اني اتزوجت على سنه الله ورسوله قبل شهر رمضان باسبوع وحتى مأعلنتش عن اي تفاصيل وقت الخطوبة ولا كتب الكتب ولا حتى الفرح ولا أي خطوات حصلت فالموضوع غير لأقرب الأقربين و ده بسبب ظروف البلد اللي كانت غير مستقرة و لانها ببساطه شديدة حياتنا احنا".

وأوضحت نعمة،"لما بدأت أشوف كومنتس سلبية على الصورة اللي نزلت وشتايم حتى مش عليا لوحدي ده كمان على الزوجة الأولى مسحت الصورة احتراماً لمشاعرها ولنفسيتي لان اكتشفت ان الناس كدا كدا مش هتسيبك ف حالك لمجرد ان المسأله كانت مسأله "تعدد" ولانك عملتي حاجة عكس اقتناعهم، وبعدها زاد الكلام وكله بقى يعلى على التاني واللي قال اني اتزوجته عشان الفلوس واللي قعد يجيب في اسكرينات قديمة من شهور طويلة لمجرد انه يجرح فينا وكان منها الحقيقي ومنها الفيك".

واستطردت، "واللي بدأ ينشر صور ليا بشعري كنت مسحتها بعد ما ربنا أكرمني بالحجاب واللي طعن وقال دي عملت كده للشهرة، وكله بقى يزايد على التاني في سبيل إيذاء أسرة قاعدة في حالها ، لحد ما نزل سيشن لينا احنا التلاتة".

وقالت ،"السيشن كان متاخد من فترة اصلا وبدون علمنا نزل بنية الدفاع عننا من أحد الفوتوجرافرز ونزله على صفحته عشان يأكد انهم عايشين حياة سعيدة ولما شوفنا الصور طلبنا انها تتمسح لان مفيش راجل هيقبل انه يشهر بأطفاله وأسرته على السوشيال بالطريقة دي وبالفعل مسحها من عنده على طول، بس كان الناس كالعادة خدوها للاسف ونشروها اكتر".

واستكملت نعمة قائلةً "يعني التريند والإعلان انتوا اللي عملتوه من البداية على حساب حياتي الشخصية، ولو كنتوا قبل أي حاجة دورتوا فى كل حساباتى عالسوشيال مكنتوش هتلاقوا ولا كلمة او صورة عن الموضوع دا قبل ما تعملو الليله دي كلها لانى حبيت احتفظ بالموضوع لنفسي و متكلمتش فيه غير بسبب دفاعي عن شتايم واتهامات اتوجهت في حقنا، وأنا لو كنت بعمل كدا عشان الشهرة زي ما البعض بيقول فأنا كان زماني قبلت عروض الناس اللي طلبت اني اطلع معاها في برامج ع التليفزيون وقنوات مشهورة ومعروفة جدا ، والاعلام يتكلم اكتر و الجرايد تتكلم اكتر واستغل التريند بحق وحقيقي".وتابعت نعمة، "النقطه التانيه وهي مقولة "انتي شخصية معروفة فمينفعش تروجي لحاجة زي كدا عشان محدش يقلدك"اولا أنا مش طالعه أقول للناس خدوني قدوه واعملو زيي لأن ببساطة تفاصيل كل واحد فينا بتختلف عن بعض وكل واحد مسؤل عن تصرفاته ومحدش عالم بالخبايا والأسباب وأسرار البيوت اللي تدفع أي حد لأخذ الخطوة دي ، ثانيا احنا معملناش حاجة حرام ولا غلط عشان نخجل منها او اننا نتكلم عنها يعني ، ومتنسوش ان الشرائع السماوية لا تقبل المزايدة ولا اتباع الأهواء".

"ونقطة اني داعيه مع اني مطلعتش في اي فيديو ليا قولت حاجة زي كدا لانها مسؤلية كبيرة مش أي حد يقدر يشيلها وفيديوهاتي كلها كانت نصيحة ليا شخصياً قبل ما تكون ليكم"، بهذة العبارة واصلت نعمة سردها لتفاصيل زواجها، " وكل الموضوع اني كنت بحاول اقدم محتوى هادف ليا وليكم، وفعليا عندى كلام كتير وظروف وتفاصيل شخصية أقدر احكيها لا يعلم عنها احد لتبرير موقفي ولكن انا مش مجبره اصلا اعمل ده لمجرد انى خدت خطوة خاصه بيا أنا ، سواء كنت شايفها انت من وجهه نظرك فيها ضرر ما أو فايده ف في الحالتين الموضوع هيأثر علينا احنا لوحدنا".

وأختتمت قائلةً:"أخر نقطة وعشان اقفل الموضوع ده بالنسبالي نهائي عايزاكم تتخيلوا معايا كدا المشهد دا لـ" اسرة متكونه من 3 أشخاص وعايشين في حالهم راضيين بنصيبهم وحياتهم" ظهرت ناس من برا دوروا فى حياتهم وخباياهم ونزلوا صورهم في كل مكان وشهروا بيهم وشتموا فيهم بأسوأ الألفاظ وكأنهم ارتكبوا جريمه لمجرد انهم اكتشفو حاجة تخص حياتهم هما لكن مش على مزاجهم".

وانهت منشورها قائلةً:"في النهايه أنا مش مسامحة أي حد اتكلم علينا وخاض في أعراض واغتابنا ولمسنا بأقذر الألفاظ واتهمني بأفعال محصلتش لمجرد اننا خدنا خطوة لا غلط ولا حرام ولا حتى تخص حد غيرنا ، ولو انتي كونك بنت معترضة على مسألة التعدد ف لكِ كامل الحرية في التعبير عن رأيك ولكن متاخديش من حياة غيرك مثال وتستغليها في اعتراضك".

ووجهت رسالة للفتيات قائلةً:"عايزه تعبري عن رأيك افهمي الحريات صح وعبري عنه من غير ما تقتحمي حرية خصوصيات غيرك السوشيال ميديا بقت عبارة عن مكان للكشف عن أسرار الناس وتتبع عوراتهم والخوض فيها واقتحام حرمه البيوت والاساءة عن جهل والغيبه والنميمة ، مش مكان للتعبير عن الرأي و الرأي الاخر ابداً ..ودا الي بقيتوا تسموه "تريند"وأنا خصيمه اي حد يوم القيامة أساء ليا عن جهل ..وبشكر كل شخص رد غيبتي وقدر يفهم المعني الحقيقي لـ "من حسن اسلام المرء تركه ما لا يعنيه".